Партизан Заболоцкай аатынан совхоз төрүттэммитэ 50 сылыгар ыһыах ыһылынна
Бу дьыл бэс ыйын 14 күнүгэр Лөгөй сирин Кэптэнитигэр Партизан Заболоцкай совхоз тэриллибитэ 50 сылыгар аналлаах үбүлүөйдээх ыһыах тэрилиннэ. Тыа хаһаайыстыбатын салаатыгар бастакы артыаллартан, табаарыстыбалартан, колхозтартан саҕалаан совхоз курдук бөдөҥ тэрээһиннээх хаһаайыстыбалар баар кэмнэригэр биһиги оройуоммутугар биир бөдөҥ хаһаайыстыбанан Партизан Заболоцкай совхоз буолбута. Оччолорго совхоз алта отделениелааҕа: Хомустаах, Даалы, Баатаҕай, Уһун Күөл, Тулуна уонна Кэптэни.
Ыһыах күн бары отделениелартан библиотека, музей үлэһиттэрэ оччотооҕу кэми кэрэһэлиир, совхоз олоҕун сырдатар быыстапканы туруордулар. Кыһыл муннуктаан саҕалаан, производство бастыҥ хамандыырдарын, чулуу үлэһит дьонун туһунан кинигэлэр, ахтыылар, стендэлэр быыстапканы киэргэттилэр. Маны таһынан, анал фотозона туран ыһыахха кэлбит үгүс дьон болҕомтотун тарта.
50 сыллаах үбүлүөйдээх ыһыахха биир сүрүн тэрээһининэн буолла - "Күүрээннээх үлэ кэмнэрэ" диэн кинигэ сүрэхтэниитэ. Кинигэҕэ совхоз тэриллиититтэн, көрдөрүүлэриттэн, ситиһиилэриттэн саҕалаан араас сылларга үлэлээбит салайааччылар, бастыҥ маяк дьон туһунан ахтыылар, хаартыскалар тиһилиннилэр. Кинигэ тахсыытыгар улахан кылаатын, сыратын ууран туран үлэлэстэ Иван Иванович Колодезников уонна нэһилиэк библиотекардара, рабочай бөлөхтөрө.
Кинигэ сүрэхтэниитин иилээн-саҕалаан ыытта Кэптэни нэһилиэгин ветеран библиотекара Мария Николаевна Андросова. Алта отделение нэһилиэктэрин баһылыктара бары эҕэрдэ тылларын эттилэр, кинигэни сүрүннээччи Иван Ивановичка махтал бэлиэлэрин туттардылар. "Суруллубут - суоруллубат" дииллэринии ветеран үлэһиттэр бу күн оччотооҕу эдэр саастарын истиҥник ахтан-санаан аастылар, хаартыскаҕа түстүлэр, ылбаҕаай ырыаларын бэлэхтээтилэр. Кинигэни олохтоох библиотекалартан уларсан ааҕыаххытын сөп.