Бастакы Президеммит Николаев М.Е. төрөөбүт күнүнэн!
Бүгүн Н.Н. Тарскай аатынан Баатаҕай орто оскуолатыгар бастакы Президеммит М.Е. Николаев төрөөбүт күнүгэр "Бары уруһуйдуубут" бырайыак чэрчитинэн оскуола үөрэннээччилэригэр уонна төрөппүттэригэр уруһуй күрэҕэ ыытылынна.
Бу бэлиэ күҥҥэ Саха Өрөспүүбүлүкэтин бастакы Президенэ Михаил Ефимович Николаев саха норуотун олорон ааспыт көлүөнэлэрин үйэлээх көмүс ыраларын олоххо киллэрбит, Айыылартан айдарыылаах, үйэлэр усталарыгар бэрт сэдэхтик көстөн ааһар сүдү личность, Америка, Япония, Кытай, Англия, Исландия о.д.а курдук бөдөҥ государстволар баһылыктарын кытта сирэй көрсөн кэпсэтиилэри ыыппыт аан дойду таһымнаах политик, Россия уонна Саха Өрөспүүбүлүкэтин бөдөҥ государственнай уонна общественнай деятелэ буоларын ахтан-санаан аастыбыт. Кини салайбыт кэмэ – Саха сирин норуоттарын саҥа историческай сайдыыларын көмүс кэмэ этэ. Маны сэргэ, нэһилиэкпит тарбахтарыгар талааннаах уруһуйдьуттарын туһунан билиһиннэрдибит, кинилэр уруһуйдарын көрдөрдүбүт. Оскуолаҕа технология учууталынан үлэлии сылдьыбыт Сивцева М.П. үөрэнэр кэмнэригэр уруһуйдаабыт хартыыналарын быыстапкатын туруоран үөрэнээччилэргэ кэпсээтэ, үгүс сэҥээриини ылла.
Ол кэннэ үөрэннээччилэр төрөппүттэрин кытары сорудах ылан уруһуй күрэҕэр кытыннылар. Манна барыта 9 ыал кыттыыны ылла. Уруһуй күрэҕин түмүгэ ахсынньы 2 күнүгэр бу бырайыак кубогын тутуу эстафетатыгар биллэриллиэҕэ.