Оҕо хамсанар дьоҕурун сайыннарыыга анаммыт олох

Бу дьыл муус устар 14 күнүгэр биһиги нэһилиэкпитигэр РСФСР норуотун үөрэҕириитин туйгуна, Учууталлар учууталлара, Саха Республикатын физическай культураҕа уонна спортка туйгуна, "Саха-Азия оҕолоро" фонда стипендиата, Е. Ф. Габышев аатынан Уус-Алданнааҕы Оҕо спортивнай оскуолатын Баатаҕайдааҕы филиалын тренерэ Николаев Николай Адамович үөрэхтээһин эйгэтигэр 50 сыл үлэлээбит үлэтин билиһиннэрэр, сатабылын атастаһар семинара ыытылынна. Бэлиэ күн бастакы чааһыгар улууспут араас оскуолаларыттан мустубут физкультура учууталларыгар, тренердэригэр Дьокуускай куораттан Баһылай Манчаары аатынан спорт национальнай киинин үлэһиттэрэ уонна Дьокуускайдааҕы С. Ф. Гоголев аатынан педагогиченскай колледж преподавателэ, биир дойдулаахпыт Николай Николаевич Охлопков кэлэн бэйэлэрин үлэлэрин билиһиннэрэн маастар кылаас ыыттылар, санаа атастастылар.

Тэрээһин иккис чааһыгар Николай Адамович үйэ аҥардаах ыыппыт үлэтин билиһиннэрэр выставкатын туруорда, ону таһынан иитэр-үөрэтэр оҕолорун көмөлөрүнэн сахалыы хамсаныыларга, өбүгэ оонньууларыгар маастар-кылаас көрдөрдүлэр. Выставкаҕа Николаевтар дьиэ-кэргэн ситиһиилэрин, үлэлэрин билиһиннэрэр муннук эмиэ дьон болҕомтотун тарта. Бу тэрээһиҥҥэ кэлбит эрэ кэрэхсии көрөн ыытылдлыбыт үлэлэртэн астыннылар, алгыс тыллаах махтаннылар.