Кэриэстэбил төлөнө
Улуу Кыайыы өрөгөйдөөх 77 сылын көрсө ыам ыйын 8 күнүгэр, Кыайыы болуоссатыгар Баатаҕайдааҕы "Сырдык Аартык" ыччат түмсүүтэ тэрийэн ыытар кэриэстэбил төлөнүгэр муһуннубут. Бу аахсыйа дойду үрдүнэн үтүө үгэскэ кубулуйан, Аҕа дойду сэриитигэр олохторун толук уурбут хорсун саллааттар, кыайыыны уһансыбыт тыыл дьонун ааттарыгар сүгүрүйэн, махтанан ыытыллар.
Бу бэлиэ аахсыйаҕа нэһилиэк ыччаттара өлбөт өрөгөй ырыаһыта, биир дойдулаахпыт, ХХ-с үйэ чаҕылхай киһитэ, государственнай, общественнай деятель, саха бастакы көлүөнэ поэттарыттан биирдэстэрэ, П. А. Ойуунускай аатынан Саха АССР Государственнай бириэмийэтин лауреата, Сергей Степанович Васильев-Борогонскай быйыл төрөөбүтэ 115 сылынан, кини хоһоонноруттан монтаж аахтылар. Олохтоох библиотека сэбиэдиссэйэ Пермякова А.П. Аҕа дойду сэриитин бэлиэ чахчыларын туһунан кылгас иһитиннэриини оҥордо.
Бу өйдөбүнньүк киэһэҕэ кыраттын эмэнигэр тиийэ кэлбит дьон, кыайыыны аҕалбыт, эйэлээх олоҕу түстээбиттэр ааттарыгар "Победа 77" кэриэстэбил төлөнүн уматтылар. Ким да умнуллубат, туох да умнуллубат!
