Оҕо сааһы оҕуурдаан тутан!
Ыам ыйын 19 күнүгэр "Оҕо сааһы оҕуурдан тутан!" Баатаҕай нэһилиэгин кэккэ аҕа саастаах дьоно мустан, урукку костердуур сиргэ тахсан Пионерия күнүн бэлиэтээтилэр. Айылҕа уһуктуута, күн чаҕылхайдык тыгар саамай кэрэ күнүгэр оччотооҕу пионердар кыһыл хаалтыс баанан, хаһыатынан оҥоһуллубут пилотка кэтэн, ырыаларын-тойуктарын дьиэрэтэн, стройунан хааман, рапорт этэн, салют биэрэн бу бэлиэ күнү уруйдуу көрүстүлэр.
"Бүгүн биһиги эмээхситтэр буолбатахпыт, бүгүн биһиги оҕолорбут" диэн ааттаан араас оонньуулары оонньоон санаалара көнньүөрдэ. Оччотооҕу кэм пионердара ыһыктарын илдьэ кэлэн, остуол тардан олорон аһаатылар. Бары сетка сумкалаах, төгүрүктүү буспут сымыыттаах, бытыылкаҕа чэйдээх, арыылаах килиэптээх, ким эрэ үтүллүбүт хортуоппуйдаах кэлэн кэрэхситтилэр. Оҕо саас умнуллубат кэрэ күнүгэр ахтыылары иһиттибит, көрдөөх-көрүдьүөс түгэннэри санастыбыт.
Өссө төгүл пионер кэккэтигэр сылдьыбыт дьоммутун Пионерия 100 сыллаах үбүлүөйүнэн истиҥник эҕэрдэлиибит! Доруобуйаны, уһун дьоллоох олоҕу баҕарабыт.
