"Баатаҕай нэһилиэгин уоттаах уулуссара"
Хас биирдии киһи төрөөбүт дойдута олорор дьиэтиттэн, олбуорун иһиттэн, олоҕун суола уулуссатыттан саҕаланар. Быйылгы үөрэх дьылыгар алын сүһүөҕү түмүктүүр 4 кылаас үөрэнээччилэрин икки ардыларыгар биллэриллибит "Баатаҕай нэһилиэгин уоттаах уулуссалара" бырайыакка барыта 9 оҕо кыттыыны ылла. Ыам ыйын 20 күнүгэр нэһилиэкпит 9 уулуссаларынан сылдьан экскурциялаатыбыт, оҕолор бырайыактарын көмүскээтилэр. Бу бырайыак ыам ыйын 28 күнүгэр түмүгэ биллэн, оҕолор алын сүһүөҕү түмүктүүр тэрээһиннэригэр наҕараадата үөрүүлээх быһыыга-майгыга туттарыллыа.
Бырайыак балаһыанньатынан хас биирдии оҕо үөрэппит, чинчийбит бырайыагар бэйэтин көрүүтүн киллэрбитэ кэрэхсэбиллээх уонна сонун буолла. Ол курдук, нэһилиэк чулуу дьонунан ааттаммыт уулуссалары чинчийбит үөрэнээччи, аймахтарыттан, оҕолоруттан ылбыт билиилэрин, матырыйаалларын толору туһаннылар, чинчийэр үлэҕэ үөрүйэхтэрин көрдөрдүлэр. Бэриллибит уулуссаларын илиилэринэн уруһуйдаан, онно ханнык тэрилтэ турарын, туох тутуу ыытыллыбытын, уулусса социальнай паспорын сиһилии сырдатан, арыйан кэпсээтилэр. Кылаас салайааччыта Светлана Дмитриевна бу бырайыак барылын кытта тута сөбүлэһэн, үөрэнээччилэригэр бүтүннүү көмөлөһөн, ыйан-кэрдэн, сүбэлээн бииргэ үлэлэстибит.
Ити курдук, уулуссаларбыт кырдьык да нэһилиэкпит историятын сырдатар эбит диэн түмүккэ кэллибит. «Мин дьиэм - мин кириэппэһим» диэн нууччаҕа бэргэн этии баар. Онон, төрөөбүт түөлбэбит ыллыгыттан саҕалаан киэн олоххо тахсыыга, ытык сирбит Баатаҕай араҥаччылыы-арчылыы сылдьыа диэн эрэллээхпит.
