Үрүҥ тунах Ыһыахтарынан!
Баатаҕай нэһилиэгэр бэс ыйын 11-12 күннэригэр икки сыл тохтобул кэннэ ыһыахтар ыытылыннылар. Нэһилиэк уопсай ыһыаҕар норуот номоҕор киирбит Манчаары, күрэппит кыыһа - Күөх Кэтириинэ быйыл төрөөбүтэ 210, норуот ырыаһыта, тойуксута, оһуохайдьыта Сивцев Семен Иннокентьевич төрөөбүтэ 90 сылларынан уонна нэһилиэк талааннаах тарбахтаахтара, иис-уус эйгэтин баһылаабыт маастардар оҥоһуктарынан анал быыстапка турда.
Бэс ыйын 12 күнүгэр - Чараҥай түөлбэтиттэн төрүттээх дьон ыһыахтара ыһылынна. Манна биһиги нэһилиэккэ бастакынан ааҕар балаҕаны үлэлэппит, аҕа дойду сэриитин кыттыылааҕа Нестерев Гаврил Федорович оҕолоро, аймахтара кэлэн кыттыыны ылан бардылар. Кинилэр ааспыт сылтан олохтоох библиотекаҕа аҕаларын, эһэлэрин аатынан фонда тэрийбиттэрэ. Бу күн фондаҕа саҥа кинигэлэри бэлэхтээтилэр, ону таһынан уола Нестерев Алексей Гаврильевич, бэйэтин сэмэй кылаатын анал счекка уган, биһиги библиотекабыт материальнай базата хаҥыырыгар анаата. Ааҕар балаҕаны үлэлэппит үтүө өҥөлөөх Гаврил Федорович оҕолоругар, аймахтарыгар библиотека аатыттан истиҥ махталбытын биллэрэбит!
