Ийэ - олохпут тирэҕэ

Алтынньы ый 16 күнэ Саха Өрөспүүбүлүкэтигэр Ийэ күнэ бэлиэтэнэр. Бу бэлиэ күн чэрчитинэн алтынньы 17-20 күннэригэр, биһиги нэһилиэккэ Ийэ күнүн декадата ыытылынна. Манна сүрүн тэрийээччинэн буолла С. Ф. Сивцев аатынан "Түмэн" норуот айымньытын киинэ. 

Олохтоох библиотека алтынньы 20 күнүгэр "Ийэ - олохпут тирэҕэ" диэн инсталлированнай выставка туруорда, ону тэҥэ киэҥ эйгэҕэ тахса илик, тарбахтарыгар талааннаах ийэлэр оҥоһуктарын, үлэлэрин билиһиннэрдэ. Инсталлированнай выставканы саха суруйааччыларын Ийэҕэ анаан суруйбут хоһоонноруттан, киэҥник биһирэммит бэргэн этиилэринэн оҥоһулунна. Маны таһынан кинилэр кинигэлэрэ туруорулунна. Бэйэлэрин оҥоһуктарын аҕалан выставкаҕа кыттыбыт ийэлэрбитигэр Раиса Белолюбскаяҕа, Александра Новгородоваҕа, Валерия Белолюбскаяҕа, Ньургуяна Сивцеваҕа, Ульяна Никитинаҕа уонна Лидия Ушницкаяҕа түгэнинэн туһанан улахан махталбытын биллэрэбит. 

Норуот айымньытын киинэ көҕүлээн, көлүөнэлэртэн биирдии ийэлэр маастар кылаастарын көрдүбүт. Ол кэннэ ийэлэр хамаанданан арахсан тэттик оонньууларга оонньоотулар, дьиэтээҕи түбүктэн сынньаннылар.  Өссө төгүл биһиги күн күбэй Ийэлэрбитин, сирдээҕи аанньалларбытын эҕэрдэлиибит! дьолу, доруобуйаны, ситиһиилэри баҕарабыт.