Норуодунай поэт Петр Тобуруокап
Бүгүн, алтынньы ый 25 күнүгэр, оҕо – аймах кутун туппут, элбэх ахсааннаах норуот сөбүлээн ыллыыр ырыаларын автора, сатира уонна юмор маастара, прозаик уонна драматург, народнай поэт Петр Тобуруокап төрөөбүтэ 105 сылын бэлиэтиибит.
Петр Тобуруокап нуучча улуу оҕо суруйааччыларыгар Самуил Маршакка уонна Корней Чуковскайга тэҥниир, норуокка үгүстүк биһирэппит, сүрэхтэригэр ыга ылыммыт, таптаппыт ырыа буолбут хоһооннордоох, оҕо аймахха үгүс кэрэхсэбиллээх айымньылары суруйан хаалларбыт, араас сценаларга туран көрөөччүлэр киэҥ биһирэбиллэрин ылбыт драматическай айымньылардаах народнай суруйааччы буоларын бары билэбит.
Хас биирдии киһиэхэ, поэт аатын иһиттэр эрэ, сирэйигэр мичээр толбоно түһэр, сырдык сыдьаай оонньуур. Ол курдук кини бар дьон биһирэбилин ылбыт, дьиҥ – чахчы норуот сууйааччыта буолар. Саха дьоно, сааһыттан тутулуга суох, оҕотуттан оҕонньоругар тиийэ, Тобуруокап ырыатын – хоһоонун күннэтэ ыллыы – туойа, умсугуйан ааҕа сылдьабыт.
Ити курдук Петр Николаевич бэйэтин олоҕун төрөөбүт норуотун ыччата сайдарын, кэскилэ кэҥиирин, саргыта салалларын туһугар анаабыта. Кини айбыт кэрэ айымньылара саха тыллаах баарын тухары үөскүүр ыччаты, үүнэр көлүөнэни үтүөҕэ – кэрэҕэ уһуйа, үөрэтэ – сайыннара, иитэ – такайа туруохтара.
Бэлиэ түгэнинэн, Петр Николаевич Тобуруокап 105 сылыгар анаан, ааҕааччыларбытыгар кини олоҕун уонна айар үлэтин туһунан тургутугу толороргутугар ыҥырабыт!