Сатабыллаах салайааччы, дьоһун киһи этэ
Бүгүн, сэтинньи 21 күнүгэр Н. Н. Тарскай аатынан Баатаҕай орто оскуолатыгар нэһилиэккэ өр сылларга салайар үлэҕэ үлэлээбит, сэрии, үлэ ветерана, нэһилиэк Бочуоттаах олохтооҕо Василий Константинович Федоров төрөөбүтэ 100 сылыгар аналлаах трээһин ыытылынна. Тэрээһини көҕүлээччинэн "Спорт Албан аата" музейы төрүттээччи, педагогическай үлэ ветерана Ксения Иннокентьевна Румянцева буолар.
Тэрээһин сүрүн тосхолунан буолла - биир дойдулаахпыт, олоҕун бүтүннүү дойдутун сайдарыгар анаабыт Василий Константинович үтүө аатын ыччат дьоҥҥо билиһиннэрии, кэнэҕэс өттүгэр үйэтитии. Манна олоҕуран кини олоҕун, үлэтин билиһиннэрэр уруоктар ыытылыннылар. Бу бэлиэ күҥҥэ Василий Константиновиһы кытары бииргэ алтыһан ааспыт, үлэлээбит дьон, айматара кыттыыны ылбыттара кэрэхсэннэ. Тэрээһиммит барыта түөрт салаанан аттарыллан ыытылынна:
1 салаа- Оонньооботох оҕо саас. Оҕо сааһын туһунан билиһиннэрдэ орто оскуола директора, музей салайааччыта Алеанна Алексеевна Бурнашева.
2 салаа- Үлэ аргыстаах олох. Василий Константинович үлэтин-хамнаһын туһунан кэпсээтэ Ксения Иннокентьевна Румянцева. Бу салааҕа анал выставка турда. Ыҥырыылаах ыалдьыттар Николай Адамович Николаев, Наталья Владимировна Готовцева үтүө тылларынан оччотооҕу кэм үлэтин, хаамыытын ахтан-санаан аастылар.
3 салаа- Олох төрдө - дьиэ кэргэн. Бу салааны олохтоох библиотека сэбиэдиссэйэ Августина Петровна Пермякова билиһиннэрдэ. В. К. Федоров дьиэ кэрэнин туһунан анал матырыйаалы көрдөрдө. Аймахтар ааттарыттан олохтоох дьаһалта экономиһа Саргылана Павловна Гоголева бэйэтин ахтыытын оҥордо.
4 салаа - Үйэтитии. Манна үйэтитиигэ кэккэ былааннары ылыныы туһунан олохтоох дьаһалта баһылыгын солбуйааччы Вероника Петровна Сивцева, В.К. Федоров аатынан уулусса туһунан орто оскуола 5 кылааһын үөрэнээччитэ Сандаара Колесова, өр сылларга тыа хаһаайыстыбатыгар үгүс сыратын ууран үлэлиир Василий Васильевич Сивцев кыттыыны ыллылар.
Бу күн ырыа да ылланна, хоһоон да этилиннэ. Түмүккэ мустубут бары ыалдьыттарга, учууталларга, үөрэнээччилэргэ бүгүҥҥү тэрээһинтэн билбиттэригэр викторина ыытылынна.
