Олоҥхо - ийэ тыл оһуора
Сэтинньи 24 күнүгэр нэһилиэкпитигэр Олоҥхо декадатын чэрчитинэн "Олоҥхо дьыктаана-2022" ыытылынна. Манна нэһилиэк олохтоохторо уонна орто оскуола 5 кылаас үөрэнээччилэрэ кытыннылар. Быйылгы дьыктаан текиһэ П. А. Ойуунускай "Дьулуруйар Ньургун Боотур" олоҥхотуттан быһа тардан ыытылынна. Дьыктааны суруйбуттарга барыларыгар туоһу суруктар, ону таһынан сыыһата суох суруксукка "Туйгун суруксут" анал аат иҥэриллэр.
"Туйгун суруксут" анал ааты ыллылар: улахан дьоҥҥо - Людмила Лугинова, оҕолорго - Ксюша Ядрихинская, Аэлита Сивцева. Кыттыыны ылбыт дьоммутугар улахан махталбытын биллэрэбит уонна өрүүтүн да төрөөбүт тылгытынан ыраастык саҥара, табатык суруйа сылдьаргытыгар баҕарабыт.
Сэтинньи 28 күнүгэр Баатаҕайдааҕы "Күнчээн" оҕо уһуйаана улууска иккис сылын көҕүлээн ыытар "Олоҥхо Боотур" кэтэхтэн күрэҕэр дьүүллүүр сүбэҕэ үлэлэстибит. Бу күрэҕи уһуйаан иитээччитэ Светлана Ивановна Готовцева иилээн-саҕалаан тэрийэр. Былырыын бу күрэх кыргыттарга туһуланан ыытыллыбыт эбит буоллаҕына, быйыл уолаттарга анаан тэриллибит. Барыта 8 уһуйаантан бэлэмнэнии бөлөх уолаттара кытыннылар.
Манна даҕатан олохтоох библиотека оҕо уһуйааныгар, иитээччи Светлана Ивановнаҕа бэйэбит түөлбэ олоҥхоһуппут Соловьев П. Н. - Намыын олоҕун, суруйан хаалларбыт олоҥхотун "Күн Ньургун" кинигэтин бэлэх ууннубут.
Үс сүрүн түһүмэҕинэн дьүүллүүр сүбэ үлэлээтэ. Ол курдук, бэйэни билиһиннэрии, талааны көрдөрүү уонна олоҥхо бухатыыра диэн анал түһүмэх. Оҕолор бары да көхтөөхтүк кытыннылар, чобуотук чуопчаардылар.