Сырдык санаа иэйиитэ

   Бэҕэһээ, ахсынньы 6 күнүгэр нэһилиэкпитигэр доруобуйаларынан хааччахтаах дьон декадаларын арыйар "Сырдык санаа иэйиитэ" бэрт сэргэх тэрээһин ыытылынна. Манна улууспут нэһилиэктэриттэн Танда, Бэрт-Ууһа, Бороҕон, Кэптэни инвалидтарын түмсүүлэрэ кыттыыны ыллылар. 

   С.Ф. Сивцев аатынан "Түмэн" норуот айымньытын киинигэр түмсүүлэр чилиэттэрин оҥоһуктарынан, Баатаҕай нэһилиэгин историятын, дьонун-сэргэтин кэпсиир кинигэ быыстапкалара мустубут дьон кэрэхсэбилин ыллылар. Ыалдьабыт диэн олорбокко, тарбахтарыгар талааннаахтар, сөбүлээн умсугуйан туран араас коллекциялары мунньар дьон бэйэлэрин үлэлэрин билиһиннэрдилэр. 

   Быыстапка кэннэ олохтоох дьаһалта баһылыгн солбуйааччы Вероника Петровна Сивцева кэлбит түмсүүлэр салайааччыларыгар эҕэрдэ суруктары туттартаата. Ол кэннэ бары сандалы остуол тула олорон сэһэргэстилэр, араас оонньуулары оонньоотулар. Тарбаҕар талааннаах иистэнньэҥ, Бороҕонтон кэлбит ыалдьыппыт маллаах иһит оҥоруутугар маастар кылаас ыытта. 

    Декада бэрт сэргэхтик, туһалаахтык саҕаланна диэн бары мустубут дьон биһирээтилэр, астыннылар.