Үтүө аата өлбөөдүйбэт!
Бүтүн дойду үрдүнэн ыытыллар Геройдар күннэрин көрсө, Баатаҕай нэһилиэгэр биир дойдулаахпыт, история билимнэрин кандидата, ССРС билимнэрин Академиятын Сибиирдээҕи салаатын үтүөлээх бэтэрээнэ, Саха Сирин культуратын уонна наукатын үтүөлээх үлэһитэ, Уус-Алдан улууһун, Баатаҕай нэһилиэгин бочуоттаах олохтооҕо Дмитрий Дмитриевич Петровка аналлаах “Үтүө аата өлбөөдүйбэт” стендэ арылынна.
2021 с. Д.Д. Петров төрөөбүтэ 100 сылын бэлиэтээбиппит. Онно ыытыллыбыт сүрүн тэрээһиннэри бэлиэтээн ааттыыр эбит буоллахха, Н.Н. Тарскай аатынан Баатаҕай орто оскуолатын история кабинетыгар Дмитрий Дмитриевич Петров аата иҥэриллибитэ, научнай практическай конференция ыытыллыбыта, бастыҥ кылаас чааһа күрэх, Петровскай диктант республика үрдүнэн үгүс кыттааччыны хаппыта. Маны таһынан, Дмитрий Дмитриевич олоҕун, үлэтин сырдатар видеоматериаллар оҥоһулланнар, киэҥ эйгэҕэ тарҕаннылар, фонда буолан нэһилиэккэ хааллылар. Ученай кинигэлэрин, киниэхэ аналлаах ыстатыйалары улуустааҕы киин библиотека электроннай библиотекатыгар тиһиллибитэ.
Стендэбит арыллыбыт тэрээһинигэр Д.Д. Петров төрөппүт улахан кыыһа Светлана Дмитриевна, кыра кыыһа Евдокия Дмитриевна уонна сиэннэрэ, Баатаҕай нэһилиэгэр олорор аймахтара күндү ыалдьыт буоллулар.
Үөрүүлээх тэрээһин нэһилиэк баһылыга Белолюбскай М.М. эҕэрдэтинэн саҕаланна. Стендэ ис хоһоонун анал салааларынан арааран оскуола директора Бурнашева А.А., историк учуутал Готовцев А.А., нэһилиэк библиотекара Пермякова А.П., ветеран учуутал Румянцева К.И. сиһилии билиһиннэрдилэр. Д.Д. Петров аатынан “Сыл бастыҥ выпускнига” анал аат бастакы стипендиата Самсонова Т.К. салайааччылаах араас сыллар стипендиаттара бэйэлэрин баҕа санааларын, эҕэрдэлэрин тиэртилэр.
“Уолан” хоһоонньуттар бөлөхтөрө, “Биэттэ” эр дьон ансаамбыла тэрээһини киэргэттилэр. Д.Д. Петров оҕолоро сиэннэрэ история кабинетыгар сыаналлаах бэлэх, үйэтитиигэ үлэлэһэ сылдьар салайааччыларга махтал суруктары туттардылар.
Тэрээһиммит бүтэһик түһүмэҕэр төгүрүк остуол тула олорон инникигэ соруктары, баҕа санаалары былаан быһыытынан ылынан үлэлэһэргэ сүбэлэстибит.
