Тыл үөрэҕин билимин доктора ыалдьыттаата
Дойду үрдүнэн биллэриллибит Уһуйааччы уонна аҕа сүбэһит, Өрөспүүбүлүкэбитигэр - Үлэ сылларыгар, төрөөбүт тыл уонна сурук-бичик күнүн көрсө олунньу 11 күнүгэр, Н. Н. Тарскай аатынан Баатаҕай орто оскуолатыгар биир дойдулаахпыт, саха учуонайа, тыл үөрэҕин билимнэрин доктора Иннокентий Николаевич Новгородов ыалдьыттаата. Иннокентий Николаевич Баатаҕай нэһилиэгиттэн төрүттээх, өбүгэлэрин сиригэр-уотугар кэлэн бэйэтин олоҕун, үлэтин билиһиннэрдэ. Үөрэҕинэн омук тылын учуутала идэлээх, ону таһынан аҕыйах ахсааннаах норуоттар тылларын үөрэтиигэ, чинчийиигэ үгүстүк үлэлэспит учуонай киһи буолар.
Иннокентий Николаевич Новгородовы дойдутун дьонугар билиһиннэрэ ыҥырбыт киһинэн - "Кылыһах" фольклорнай-образцовай студияны төрүттээбит, саха тылын уонна литературатын учууталынан өр сылларга үлэлээбит, энтузиаст уһуйааччы Вера Иннокентьевна Троева буолар.
Бу бэлиэ күҥҥэ нэһилиэк салалтата, тэрилтэлэрэ, орто оскуола учууталлара, ыччаттара кыттыыны ыллылар. Тэрээһин маҥнайгы чааһа тыл уонна өрөспүүбүлүкэтээҕи "Инникигэ хардыы" конференция тула кылаас чааһа ыытылынна. Тэрээһин иккис чааһыгар нэһилиэк баһылыга М.М. Белолюбскай эҕэрдэ тылынан, нэһилиэк ыччаттара норуот ырыатын толорууларынан саҕаланна. Оскуола учууталлара Самсонова Т.К., Дмитриева С.С., Саввина Е.М., Гоголева М.А., "Күнчээн" уһуйаан иитээччитэ Готовцева С.И. саха тылын үөрэтиигэ, иҥэриигэ үлэлэрин билиһиннэрдилэр, ветеран учууталлар Троева В.И., Румянцева К.И. кэс тылларын анаатылар. Олохтоох библиотека оҥорбут буклетын тэрээһиҥҥэ кэлбит ыалдьыттарга, үөрэнээччилэргэ, учууталларга тарҕаттыбыт. Инникитин бииргэ үлэлэһэргэ соруктары ылыннылар.
