Төрөөбүт тылбыт - барҕа баайбыт!

Ийэ тыл, сурук-бичик күнүн бэрт киэҥ далааһыннаахтык бэлиэтээтибит. Ол курдук, декада устата олохтоох библиотекаҕа ийэ тылга аналлаах кинигэ быыстапката турда. Быыстапка сүнньүнэн куйаар ситимигэр "Саха тылын төһө билэҕин?" диэн тургутук ыытылынна.

Маны таһынан, олунньу 16 күнүгэр библиотека иһинэн үлэлиир "Эйгэ" түмсүү чилиэттэригэр сахалыы тыыннаах тэрээһин тэрилиннэ. Сандалы остуол тула олорон, сахалыы симэнэн төрөөбүт тылбыт тула сэһэргэстибит, аралдьытыы оонньууга кытынныбыт. Бастыҥ билиилээхтэргэ: Наталья Готовцеваҕа, Евдокия Гоголеваҕа, Марта Ушницкаяҕа сэмэй бэлэхтэр туттарылыннылар. 

Олунньу 18 күнүгэр "Күнчээн" уһуйааҥҥа уонна орто оскуолаҕа сылын аайы ыытыллар үгэскэ кубулуйбут өрөспүүбүлүкэтээҕи "Сахалыы дьыктаан" аахсыйа ыытылынна. Дьыктааҥҥа барыта 9 улахан киһи, 5 үөрэнээччи кытынна. Бастыҥ суруксуттарга анал ааттар, кыттыбыттарга туоһу суруктар туттарыллыахтара. 

Ааҕааччыларбытын, көрөөччүлэрбитин төрөөбүт тылбытынан сайаҕастык саҥарарга, табатык суруйарга, бэриниилээхтик ааҕарга ыҥырабыт!