"Үс Хочолор" ыалдьыттаатылар!
Олунньу ый 25 күнүгэр ыаллыы сытар Нам улууһун библиотекаларын үлэһиттэрдээх "Үс хочо" түмсүү чилиэттэрэ ыалдьыттаан аастылар. Бу түмсүү кэрэ аҥардара түмсэ түстүлэр эрэ, тимир көлөлөрүгэр олорон Сахабыт сирин кэрэ, ытык сирдэринэн сылдьан сынньаналларын, үлэлэригэр туһалааҕы иҥэринэллэрин, дьону кытары алтыһалларын, санаа атастаһалларын бэлиэтээтилэр.
Баатаҕай нэһилиэгэр кэлбит сүрүн соруктарынан - кыһыҥҥы муҥхаҕа сылдьыы буолла. Бу сырыыларын биир дойдулаахпыт, Нам улууһун Хамаҕаттатыгар олорор Мария Николаевна Аманатова иилээн-саҕалаан, хонон-өрөөн илдьэ сырытта. Муҥхаҕа сылдьан астынан, илии тутуурдаах, өттүк харалаах тахсыбыттарыттан астыннылар, үөрдүлэр. Олохтоох библиотекаҕа Нам улууһугар холкуостааһын үлэтин уонна олоҥхоһуттарын тустарынан кинигэлэри бэлэх ууннулар. Инникитин да сибээһи тутарга санааларын эттилэр.
