"Түмсүүнэн сайдыыга, үлэнэн үрдэлгэ" улуустааҕы фестиваль
Кулун тутар 6-23 чыыһылаларыгар улууспут нэһилиэктэригэр уус-уран самодеятельность фестивала ыытылынна. Быйылгы фестиваль Россияҕа Учуутал уонна уһуйааччы, Саха Республикатыгар Үлэ, Уус Алдаҥҥа инфраструктура сайдыытын сылларыгар туһуланан тэрилиннэ. Кыра нэһилиэктэргэ уопсайа 10 нэһилиэк кыттыыны ылла. Фестиваль икки хайысханан тэрилиннэ, ол курдук нэһилиэк уус-уран самодеятельноһын, "Уһуйааччы" уонна "Үлэ династиялара" диэн быыстапкалары көрүү.
Улуустааҕы фестиваль түмүктүүр тэрээһинэ - кулун тутар 23 күнүгэр Баатаҕай нэһилиэгэр ыытылынна. Быыстапкаҕа нэһилиэккэ олорор уһуйааччылары, удьуорунан утумнаспыт үлэһиттэри билиһиннэрдибит. "Үтүөкэннээх уһуйааччылар" диэн ааттаан нэһилиэк үлэтигэр көмөлөһөр, историятын үөрэтиигэ сирдиир, биир ситимнээх үлэни тэрийсэр 5 уһуйааччыны сырдаттыбыт. Уһуйааччыларбыт Троева Вера Иннокентьевна - саха култууратын, фольклорун, Николаев Николай Адамович - чөл олоҕу, спорду, Румянцева Ксенья Иннокентьевна - төрүт култуураны, кыраайы үөрэтиини, Готовцева Наталья Владимировна - сырдыгы, кэрэни, Федоров Николай Константинович - төрүт үгэһи, Данилова Людмила Ивановна - төрүт ииһи тарҕатааччыларынан буолаллар. Кинилэр бу эйгэҕэ бэйэлэрин суолларын хаалларбыт, үлэлэрин салгыыр утумнааччылардаахтар.
"Удьуорум утума - дьылҕам бэлэҕэ" диэн ааттаан нэһилиэккэ олорон ааспыт, олорор үлэ династияларын билиһиннэрдибит. Манна киирдилэр удьуор уустар: Маайаан уус - Сивцевтэр, Миичэкэ ууч - Готовцевтар, Никиитэ уус - Готовцевтар, Сивцевтэр, Петровтар - учууталлар династиялара. Тарбахтарыгар талааннаах уустарбыт, утум иистэнньэҥнэрбит чочуйбут оҥоһуктара, учууталлар портфолиолара экспонат быһыытынан тураннар дьон биһирэбилин ыллылар, быыстапканы киэргэттилэр. Бу фестивальга бэлэмнэммит матырыйааллары сиһилии билсиэн-көрсүөн баҕалаахтар олохтоох библиотекаттан ыйыталаһаргытыгар.
Фестиваль түмүгүнэн быыстапкаҕа биһиги нэһилиэк 4.9 баалы ылан II м. ылары ситистибит. Түгэнинэн туһанан быыстапкаҕа үлэлэспит дьоммутугар, тэрилтэлэргэ улахан махталбытын биллэрэбит.