Баатаҕайга Пионерия күнэ!
Ыам ыйын 19 күнэ - Пионерия күнэ! Бу күн үтүө үгэс буолан элбэх көлүөнэ ыччаты сыллата ахсын түмэр күн. билигин, урукку курдук, хас оскуола ахсын оҕо тэрилтэлэригэр үөрүүлээх линейкалар, коммунарскай сбордар, станциянан оонньуулар, тимуровскай үлэлэр, костердар, оҕо тэрилтэтин кэккэтигэр ылыы тэрээһиннэрэ ыытыллаллар, кэлиҥҥи сылларга быдан суолталанан, сөргүтүллэн эрэллэр. Ол аата көлүөнэ икки ардыгар ситим уонна ытыктабыллаах сыһыан баар эбит.
Бу күн Н. Н. Тарскай аатынан Баатаҕай орто оскуолатыгар пионер кэккэтигэр сылдьыбыт, кыһыл хаалтыс бааммыт оччотооҕу ыччат уонна билиҥҥи кэм оҕолоро тоҕуоруһа муһуннулар. Горн, барабан тыаһынан ньиргийэн бэрт сэргэх тэрээһин аһылынна. Пионерия туһунан өйдөбүлү, Баатаҕайга 30-с сыллартан үлэлээбит пионерскай тэрилтэ историятын, маҥнайгы слет кыттыылааҕын тустарынан кылгас иһитиннэрии оҥоһулунна. Пионер кэккэтигэр сылдьыбыт дьоммут маршировкалаан, речевкаларын ыллаан, андаҕар тылларын этэн билиҥҥи ыччат дьоҥҥо көрдөрөн билиһиннэрдилэр. Маны таһынан, хас биирдии пионер сетка суумкатыгар бытыылкаҕа утахтаах, төгүрүктүү буспут сымыыттаах, арыылаах килиэптээх кэлбитэ кэрэхсэннэ. Орто оскуола музейын матырыйаалларыттан пионерскай тэрилтэ историятын, араас сылларга ыытыллыбыт слет кыттыылаахтарын туһунан быыстапка турбута биһирэннэ.
Пионер - чинчийээччи, саҥа суолу арыйааччы, тэлээччи. Пионерия туһунан аныгы ыччат харахтарынан көрөн, эт кулгаахтарынан истэн, үлэ бары хайысхатыгар, үөрэхтээһиҥҥэ "Куруук бэлэммин!" диир үтүө өйдөбүлүн ылбыттара буолуо диэн эрэнэбит.
