Петровскай диктант түмүгэ
Бу дьыл ахсынньы 8 күнүгэр, Геройдар күннэрин көрсө биир дойдулаахпыт ученай - историк, сахалартан бастакынан Аҕа дойду сэриитин тематын үөрэппит, чинчийбит Дмитрий Дмитриевич Петров төрөөбүтэ 100 сылынан өрөспүүбүлүкэ таһымнаах аахсыйа ыытыллыбыта. Бу аахсыйаҕа өрөспүүбүлүкэбит араас муннуктарыттан барыта 1598 киһи кыттыыны ылла. Маннык үрдүк кирбиини ситиһэргэ көмөлөспүт биир дойдулаахтарбытыгар, улууспут, нэһилиэкпит салалтатыгар, үөрэх, култуура управлениеларыгар, Саха Өрөспүүбүлүкэтин Национальнай библиотекатыгар, улууспут киин уонна нэһилиэктэрин библиотекаларыгар улахан махталбын тиэрдэбин.
Аахсыйаҕа элбэх киһини кытыннарбыт Бүлүү улууһун дьонугар улахан махталлаахпыт. Бүлүүлэр Д.Д. Петров сырдык аатыгар сүгүрүйэллэр, кинилэр үс Геройдарын аатын тилиннэрбитигэр убаастабылларын, ытыктабылларын биллэрэллэр.
"Биһиги күүспүт түмсүүгэ!" дииллэринии, бары биир санаанан түмсэммит, көҕүлээммит саха норуотугар сүдү өҥөлөөх учуонайбыт аатын үйэтитиигэ биир улахан тэрээһини ыыппыппытыттан астынныбыт.
Учуонай Петров үтүө аата көмүс буукубанан үйэлэргэ ааттаннын! Барыгытыгар чэгиэн туругу, чөл доруобуйаны, үлэҕэ, үөрэххэ үрдүк ситиһиилэри баҕарабыт.
М. К. Федорова аатынан Баатаҕай библиотекатын
сэб. Пермякова А.П.
