Үбүлүөйдээх дьоммутугар түмүктүүр тэрээһин

Бу дьыл ахсынньы 11 күнүгэр биһиги нэһилиэккэ икки үбүлүөйдээх дьоммутугар - култуура эйгэтигэр өр сылларга эн-мин дэһэн үлэлээбит библиотечнай үлэ ветерана Мария Константиновна Федорова төрөөбүтэ 85 уонна Саха Республикатын култууратын туйгуна Семен Федорович Сивцев төрөөбүтэ 70 сылларын түмүктүүр тэрээһин "Түмэн" норуот айымньытын киинигэр буолан ааста. 

Норуот айымньытын киинигэр киирээти кытта икки үбүлүөйдээх дьоммутугар аналлаах выставкалар турдулар. Мария Константиновна үбүлүөйдээх сылыгар олохтоох дьаһалта көҕүлээһининэн, библиотекаҕа саҥа вывеска ыйанна. Ону таһынан улуус киин библиотекатын эҕэрдэ аадырыһын, бииргэ үлэлээбит коллегаларын, ветеран библиотекардар, Мария Константиновна аймахтарын эҕэрдэлэрин, алгыс тылларын иһиттибит. 

Семен Федоровичка билиҥҥи кэм ирдэбилинэн, араас таһымнаах күрэхтэр кэтэхтэн да буоллар бэрт тэрээһиннээхтик ыытылыннылар. Күрэх кыайыылаахтарыгар наҕараадалары үөрүүлээх быһыыга-майгыга туттардылар. Бэлиэтиэҕи баҕарыллар, тэрээһин бэлиэ түгэнинэн буолла С. Ф. Сивцевкэ анаммыт "Дэгиттэр талаан" кинигэ сүрэхтэниитэ. Кинигэ автора ССРС култууратын туйгуна, өр сылларга бииргэ үлэлээбит, алтыспыт коллегата Наталья Владимировна Готовцева буолар. Бу киэһээ Семен Федорович доҕотторо, табаарыстара, аймахтара кэлэн кыттыыны ыланнар истиҥ ахтыы киэһээтэ ааста. 

Быйылгы үбүлүөйдээх сылга махталбытын тиэрдэбит нэһилиэкпит дьаһалтатыгар, олохтоохторугар, улуустааҕы киин библиотека, култуура управлениетын салалтатыгар, ону тэҥэ ветераннарбыт оҕолоругар, аймахтарыгар! Барыгытыгар дьолу, доруобуйаны, ситиһиини баҕарабыт.