Раиса Борисова хоһоонноро
- Информация о материале
- Опубликовано: 08.11.2021 16:39
- Просмотров: 205
КЭПТЭНИ ЭН ЭРЭ КЭРЭҔИН,
ЫЦЫРА УГУЙА ТУРАҔЫН...
Төрөөбүт-үөскээбит түөлбэбит,
Оонньообут улааппыт биһикпит
Кэптэни эн эрэ кэрэҕин,
Ыҥыра угуйа тураҕын.
Сөтүөлээн сөрүүкүүр эбэбит
Киэлитэ кэҥээбит үөрдээри,
Балыга собото тупсубут
Ыалдьыты кэһиилээх көрсөөрү.
Хатыҥнаах чараҥҥар хаамабын
Оҕотук саастарбын саныыбын,
Уҥуохтаах отону көрдөөммүн
Бэс чагда быыһынан сырсабын.
Ийэбит эбиэккэ ыҥырар
Минньигэс алаадьы буһарар,
Остуолга толору олорон
Отонноох күөрчэҕи оймуубут.
Аһаат да хачыаллыы сүүрэбит
Кынаттаах чыычаахтар буолабыт,
Көтөбүт эбэни кырыйа
Көрөбүт кууланы манньыйа.
Ол мааны хачыалбыт, биһикпит
Күүтэҕин кэтэһэ сонньуйа
Ким кэлэн эйиэхэ олорор
Кэтэһэр баҕааҕын толорор.
Күндүтүк саныыбыт эйиигин
Кэтиибин эйиэхэ тиийэрбин
Кэптэни эн эрэ кэрэҕин,
Ыҥыра угуйа тураҕын!
ХАЧЫАЛ МАҺЫМ, БИҺИГИМ
Оҕо сааһым биһигэ,
Хачыал маһым кэрэҕин,
Өссө үөһээ, өссө күүскэ
Биэтэҥнэтэн биэрэҕин.
Күнү быһа, биһиги,
Хачыаллыыбыт, саатыыбыт,
Күүскэ тэбэн ылабыт
Үөһээ көтөн тахсабыт.
Субу курдук көстөрө
Эбэ мааны киэлитэ,
Ыраах хопто көтөрө,
Ыраах сылгы кистиирэ.
Өссө күүскэ анньынным
Өссө үөһээ таҕыстым,
Көтөн тахсыах эбиппин,
Көтөн хаалыах курдукпун.
Хачыал маһым, биһигим,
Кэтэһэҕин, эн миигин,
Ахтар киһиҥ, тиийиэҕэ,
Биһик маһын мииниэҕэ.
Өссө күүскэ көтүөҕэ,
Өссө үөһэ тахсыаҕа,
Эбэ мүөттээх салгынын
Үөрэ-көтө ыймахтыа.
****
Дьүөгэлэрим кыргыттар
Эһи ханна сылдьаҕыт?
Иһирэхчэй ийэлэр
Килбик кэрэ кийииттэр.
Айылҕаттан ананан
Айыллаҥҥыт сылдьаҕыт,
Хайа дьоллоох сүрэҕин
Чопчулара буолаҕыт.
Этэр-тыынар тылгыттан
Иһиттиннэр оҕолор,
Истиҥ сылаас мичээргин
Бэлэхтээ дуу сиэннэргэр.
Хаһан эмит быыс булан
Баатаҕайга кэлээриҥ,
Нарын-намчы бэйэҕит
Намылыһан киирээриҥ.
Үгүс элбэх кэпсээни
Ыһа-тоҕо кэпсээриҥ,
Кэтэһиилээх киэһэҕэ
Кэрэхсэллээх биир дьиэҕэ.