Алексеева Анна Алексеевна

Анна Алексеевна 1928 с. Уус-Алдан оройуонугар Чараҥайга Маралыкы диэн алааска Алексей, Матырыас Бурнаһыаптар дьиэ-кэргэҥҥэ үһүс оҕонон күн сирин көрбүтэ. 1946 с. Чараҥай сэттэ кылаастаах оскуолатын бүтэрбигэ. Сэрии сылларыгар аас-туор олоҕу, аччыктааһыны- хоргуйууну билэн, ыарахаттары тулуйан улааппыта. «За доблестный труд в Великой Отечественной войне 1941-45 гг.» диэн мэтээлинэн наҕараадаламмыта. Сэрии кэнниттэн Дьокуускай куоракка культурнай-сырдатар училищеҕа библиотекарь идэтигэр үөрэнэ сылдьан, доруобуйатын туругунан дойдутугар төннөн тахсыбыта. 1948 с. Алексеев Петр Павлович диэн учуутал идэлээх эдэр киһиэхэ кэргэн тахсыбыта. Анна Алексеевна төһө да сылы сыллата оҕолордооҕун иһин дьиэҕэ олорботоҕо. 1960-61 сс. Тумулга дьааһыла-саадка повардаабыта. Онтон 1961 с. Эрбэһиҥҥэ көһөн кэлэн, оскуола интернатыгар иитээччинэн үлэлээбитэ. 1962 с. эдэр ыал Баатаҕайга олохсуйардыы көһөн кэлбиттэрэ. Дьоннорун көмөтүнэн дьиэ туттубуттара. Анна Алексеевна 1969 сылга диэри Баатаҕай детсадыгар сэбиэдиссэйинэн, онтон пенсияҕа тахсыар диэри 10 сыл старшай сестранан үлэлээбитэ. Пенсияҕа тахсан баран 2 сыл поварынан үлэлээбитэ. Ол кэнниттэн 1983-1988 сс. совхозка итии муннукка повардаабыта.

Анна Алексеевна Петр Павловичтыын 51 сыл эйэ-дэмнээхтик бииргэ олорбуттара, 10 оҕону төрөтөн, элбэх сиэннэнэн, хос сиэн тапталын билэр дьолго тиксибиттэрэ. Кыһыл көмүс сыбаайбаларын 10 оҕолоро дьиэ-кэргэнинээн бары мустан бэлиэтээбиттэрэ.

Оҕолоро ийэлэрин туһунан бу курдук ахталлар: «Биһиги ийэбит киһи быһыытынан олус сымнаҕас, элэккэй, киһиэхэ үтүөнү эрэ баҕapap кэрэ дууһалааҕа. Ийэбит олус холку майгылааҕа. Ыал ийэтин быһыытынан сатаабата диэн суоҕа: уран тарбахтаах иистэнньэҥ, талба астаах асчыт, өлгөм үүнүүлээх оҕуруотчут. техникаҕа да сыстаҕас этэ. Кини хаһан да таах олорбото, дьиэ ис-тас үлэтин бүтэрбитэ, сүөһүтүн-аһын бэрийбитэ эрэ баар буолааччы. Айылҕаҕа сылдьарын олус сөбүлүүрэ. Бэйэтэ ааҕан, үөрэтэн эмтээх оту хомуйуунан дьарыктанара, хатаран кыһынын сиэннэригэр хаһаанара».

Анна Алексеевна ыарахан ыарыынан ыалдьан 2004 с. ахсынньы 14 күнүгэр күн сириттэн күрэммитэ.