Александрова Екатерина Ивановна

Информация о материале
Опубликовано: 16.05.2022 10:43
Просмотров: 182

1926 сыллаахха от ыйын 2 күнүгэр Уус-Алдан улууһун Баатаҕай нэһилиэгэр төрөөбүтэ. Чараҥай 7 кылаастаах оскуолатын бүтэрэн баран, 1944 сыллаахтан Карл Маркс аатынан колхозка хонуу уонна сүөһү үлэтигэр сылдьыбыта.

1945-48 сс. Якутскайдааҕы культурнай-сырдатар училища библиотечнай салаатыгар үөрэммитэ. Үөрэҕин ситиһиилээхтик бүтэрэн, орто анал үөрэхтээх библиотекарь дипломун ылан, 1948 сыллаахтан Хоро нэһилиэгин Maйаҕас бөһүөлэгэр библиотекарынан үлэлээбитэ. Онтон 1963 сылтан 1980 сылга диэри Г.В. Егоров аатынан Мүрү 1№-дээх орто оскуолатыгар библиотекарынан үтүө суобастаахтык үлэлии сылдьан, бочуоттаах сынньалаҥҥа тахсыбыта. Кини «Ийэҕэ Үрдүкү Махтал» анал бэлиэнэн наҕараадаламмыта. Екатерина Ивановна төрөөбүт Баатаҕайын уонна өр сылларга олорбут, үлэлээбит Мүрү нэһилиэктэрин Бочуоттаах олохтооҕо.

Екатерина Ивановна 1950 сыллаахха Фрося, Роза уонна Коля диэн оҕолорунаан огдообо хаалбыт Василий Николаевич Мигалкиҥҥа кэргэн тахсан 9 оҕоломмута. Василий Мигалкин (1912-1972 сс.) төрөөбүт-үөскээбит Уус-Алданыгар дириҥник ытыктанар педагог уонна салайааччы этэ. Билигин Чараҥ орто оскуолата В.Н. Мигалкин сырдык аатын сүгэр.

Екатерина Ивановна үс оҕону кыра саастарыттан иитэн, бэйэтин 9 oҕотун улаатыннаран. 12 оҕолоох күн-күбэй ийэнэн биллэр.

Е.И.Александрова үлэлиир сылларыгар «Правда» хаһыат редакциятын уонна Правда» издательствотын, ССКП КК «Советская Россия» уонна «Известия» хаһыаттарын Бочуотунай грамоталарынан наҕараадаламмыта. 1988 с. Бороҕоннооҕу оҕо музыкальнай оскуолатын 30 сыллаах юбилейыгар Екатерина Ивановна аата бу оскуола «Бочуотун кинигэтигэр» үйэ-саас тухары киирбитэ. Кини оҕолоро: Миша - баян, Саша, Маша уонна Катя — фортепиано кылаастарыгар Бороҕоннооҕу музыкальнай оскуолаҕа ситиһиилээхтик үөрэммиттэрэ.

Екатерина Ивановна оҕолоро кыраларыгар Василий Николаевич күн сириттэн хомолтолоохтук арахсан, оҕолорун үгүстэрин библиотекарь кыракый хамнаһыгар улаатыннарбыта, үөрэхтээх дьон оҥортообута туһугар хорсун быһыы курдук көстөр. Ыал улахан оҕото Ефросинья Васильевна - Читатааҕы партийнай оскуоланы бүтэрбитэ. Төрөөбүт оройуонугар Хоро уонна Мүрү нэһилиэктэрин Сэбиэтин председателинэн, олох-дьаһах өҥөтүнэн хааччыйар комбинат директорынан, кэлин ССКП обкомун издательствотыгар үлэлии сылдьан, 1990 с. ыалдьан соһуччу өлбүтэ.

Розалия Васильевна — бухгалтер идэлээх. Амма улууһугар сибээс узелыгар өр сылларга үлэлээбитэ, үлэ ветерана, эдэр сааһыттан үчүгэй спортсменканан, уус-уран самодеятельность актыыбынай кыттыылааҕынан биллэр. Уран тарбахтаах норуот маастара.

Николай Васильевич - Намнааҕы педагогическай училищены, Зоя Васильевна уонна Петр Васильевич Новосибирскайдааҕы полиграфическай техникуму бүтэрбиттэрэ. Уус-Алдан олохтоохторуттан Зоя Васильевна үһүс киһинэн ССРС бэчээтин туйгунун үрдүк аатын ылбыта. Кини Мүрү нэһилиэгин Бочуоттаах олохтооҕо. Василий Васильевич - Томскайдааҕы автоматизированнай системаны салайыы уонна радиоэлектроника институтун бүтэрбитэ. Космофизик идэлээх. Рационализатор быһыытынан научнай элбэх саҥа арыйыылары оҥорон, ССРС Наукаларын Академиятын Сибиирдээҕи отделениетын Үрүҥ Көмүс медалынан наҕараадаламмыта. Байконурга космонавтар көтүүлэригэр хас да төгүл кыттан үлэлэспитэ. Байыаннай сэбилэниигэ билигин да кистэлэҥҥэ туттуллар хас да техническэй үлэлэрдээх. Компьютерга сахалыы алфавиты оҥорбут учуонай быһыытынан биллэр. Техническай наука кандидата.

Иван Васильевич - хоһоон, кэпсээн, остуоруйа, публицистика уонна очерк элбэх кинигэтин автора. Бүлүүтээҕи педучилищены уонна Москватааҕы Литературнай институт поэзияҕа отделениетын бүтэрбитэ. Саха Республикатын культуратын үтүөлээх үлэһитэ, айар үлэтэ СР президенын “Гражданскай килбиэн” анал бэлиэнэн наҕараадаламмыта. СР бэчээтин, культуратын уонна үөрэҕириитин туйгуннара. Уус-Алдан улууһун уонна Мүрү, II Лөгөй нэһилиэктэрин Бочуоттаах гражданина.

Михаил Васильевич - Саха Республикатын доруобуйаҕа харыстабылын уонна культураҕа туйгуннара. Хас да медалларынан уонна Комсомол Киин Комитетын “Пятилетка эдэр гвардееһа” үрүҥ көмүс знагынан наҕараадаламмыта. Тиис бырааһа идэлээх.

Александр Васильевич - СГУ омук тылын факультетын английскай салаатын, Москватааҕы Үрдүкү комсомольскай оскуоланы, Российскай Федерация Президенын иһинэн Москватааҕы салайыы Академиятын аспирантуратын бүтэртээбитэ. Философскай наука кандидата. РФ НА естественнай наукаларга академига. РФ «Ытык иэс уонна Чиэс рыцара» орденынан, СР президенын «Гражданскай килбиэн» анал бэлиэнэн наҕараадаламмыта. СР норуотун хаһаайыстыбатын үтүөлээх үлэһитэ, Уус-Алдан улууһун уонна II Лөгөй, I Хоро нэһилиэктэрин Бочуоттаах гражданина, СР тас сыһыаҥҥа министринэн, АХШ Аляскаҕа СР Хотугу Форумҥа бэрэстэбиитэлинэн, Монголия Республикатыгар Генеральнай Консулунан үлэлээбитэ.

Афанасий Васильевич - Мэҥэ-Хаҥалас уонна Уус-Алдан райкомоллар I секретарынан, СР Правительствотын иһинэн Ыччакка бастайааннай комиссиятын председателинэн, СР Правительствотын территорияны кытта үлэҕэ уонна бэйэни салайыныыга Департаменын начальник-министринэн, Саха сирин норуоттарын уонна федеративнай сыһыаннаһыыларга Департаменын начальнига үлэлээбитэ. СР норуотун хаһаайыстыбатын үтүөлээх үлэһитэ, Уус-Алдан улууһун уонна Байаҕантай, Мүрү, II Лөгөй, I Өспөх нэһилиэктэрин Бочуоттаах гражданина.

Мария Васильевна - СГУ омук тылын факультетын французскай отделениетын бүтэрбитэ. «Айар» кинигэ кыһатын үөрэх уонна оҕо литературатын редактора. Саха Республикатын үөрэҕириитин туйгуна.

Екатерина - Благовещенскайдааҕы тыа хаһаайыстыбатын институтун бүтэрбитэ. Экономист-бухгалтер идэлээх.

Ефимов Д.А., Румянцева К.И., Бурцева Р.И. Улахан Олох аргыстара.

 – Дьокуускай: 2010. - 84-86 с.