Аманатова Анна Иннокентьевна
- Информация о материале
- Опубликовано: 16.05.2022 11:10
- Просмотров: 176
Анна Иннокентьевна 1938 сыл алтынньы 28 күнүгэр Баатаҕай нэһилиэгэр «Молотов» аатынан колхозка, Биэттэ куулатыгар колхозтаах кэргэҥҥэ төрөөбүтэ. Aҕата Новгородов Иннокентий Игнатьевич, ийэтэ Новгородова (Ушницкая) Варвара Кузьминична, бииргэ төрөөбүттэрэ: Ушницкай Прокопий Кузьмич — сэрии кыттыылааҕа, үс кыыстаах, Ушницкая Анна диэн кэргэннэммитэ, оҕото суох, субан сүөһүгэ үлэлээбитэ, Ушницкая Вера Иннокентьевна, биир уоллаахтара өлбүтэ.
Анна Иннокентьевна бииргэ төрөөбүттэрэ 7-лэр: Иннокентий (Эмтэй), Игнатий (Сууххай), Петр (Солдат), Алексей соҕуруу өлбүтэ, Анна, Миша, Таня.
Анна оскуолаҕа адьас үөрэммэтэҕэ. 12 саастааҕыттан колхозка сүөһү, субан сүөһү көрүүтүгэр, онтон наар доярканан үлэлээбитэ. Кыһынын Кус Уларга, Орто Эбэҕэ, Өрүс Бэстээҕэр, Халдьаайыга кыстыыра, сайынын бары сайылыктарынан үлэлээбитэ. Ыанар ынахтарын ахсаана 20-28 дылы төбөнү ыыллара, үүтүн сепараторнай пууҥҥа, арыы заводугар туттараллара. Биирдии ынахтан 2300 л. үүтү ыы сылдьыбыта, бары көөнньөрбөнү дояркалар бэйэлэрэ оҥороллоро, биирдии ынахха 15-20 л. көөнньөрбөнү оҥорор этилэр.
1988 сыл пенсияҕа тахсан баран дояркаттан уурайбыта.
1964 с. олоҕун аргыһын Юрий Гаврильевич Аманатовы көрсөн ыал буолаллар. 10 оҕолоноллор: 6 уол, 4 кыыс: Дуня. Юра, Петр, Коля, Ваня, Ганя, Миша, Ира, Тамара, Аня. Оҕолор улаатан норуот хаһаайыстыбатын араас салаа үлэлэригэр үлэлии сылдьаллар, сорохторо ыал буолан олороллор. Элбэх сиэн, хос сиэн эбээтэ буолар.
Ситиһиилээх үлэтин иһин Правительство, райком, райсовет, сельсовет Бочуотунай грамоталарынан, дипломнарынан наҕараадаламмыта.
Ийэ Албан аатын I, II степеннээх, Герой Ийэ сулуһунан, үлэ ветеранын мэтээллэринэн наҕараадаламмыта.