Сивцева Елизавета Васильевна

1935 с. кулун тутар 21 күнүгэр Уус-Алдан оройуонун колхозтаах кэргэнигэр төрөөбүтэ. Мүрү күөлүн арҕаа баһыгар I Лөгөй нэһилиэгэр бөлөхтөһүү колхозка Гоголевтар ыалга күн сирин көрбүтэ. Аҕата Василий Лукич Аҕа дойду уоттаах сэриитигэр бастакы хомуурга ыҥырыллан түөрт сыл сэриилэһэн баран «Хорсунун иһин» мэтээллээх дойдутугар эргиллибитэ уонна сэриигэ ылбыт бааһыттан сыл буолаат өлбүтэ. Ийэтэ - Анастасия Еремеевна 5 оҕолоох тулаайах хаалан баран колхоһугар ыанньыксыттаабыта. Лиза кыра сааһыттан ийэтин бииргэ төрөөбүт эдьиийэ Балбаараҕа иитиллибитэ. Оҕо сааһа Тулунаҕа Таргылдьыма эбэ хонноҕор-быттыгар ааспыта. Сэрии сыллара буолан оонньоон-көрүлээн ааспатаҕа, колхоз үлэтигэр 8-9 сааһыттан саас ыһыыга оҕус сиэтиитигэр, сайын от мунньуутугар, күһүн хомуурга хортуоппуй, оҕуруот аһын хостооһунугар үлэлээбитэ. Ол гынан баран сут-кураан сатыылаан от, бурдук үүммэтэҕэ. Аччыктааһын саҕаламмыта. Маҥнай Томтор начальнай оскуолатыгар дьиэтиттэн сылдьан үөрэммитэ. Онтон Мүрү орто оскуолатыгар үөрэнэ барбыта. Интернакка ылбатахтарын иһин райкомол I секретара Ф.И.Васильевка тиийэн ытыы-ытыы көрдөспүтүн иһин интернакка ылбыттара. Интернакка, сороҕор ыалга олорон Мүрү оскуолатын 7 кылааһын бүтэрбитэ. Салгыы үөрэнэр кыаҕа суох буолан 17 саастаах кыыс Бороҕон райпотун «Хардыы» диэн Суоттулуур айан суолун ортотугар турар маҕаһыыҥҥа атыылааччынан үлэлээбитэ. Ити 1952 сыллаахха этэ.

1953 с. олоҕун аргыһынаан Н.И.Сивцевтыын билсэн 1954 с. саахсаланаллар. Кэргэнин дойдутугар Уус-Алдан оройуонугар Баатаҕай, Найахы нэһилиэктэринэн маҥнай үүт учуотчутунан, онтон Найахы балыыһатыгар 1-2 ыйдаах курсу баран медсестранан үлэлиир. Онтон салгыы Баатаҕай медпуунугар 1965 с. диэри үлэлээбитэ. Дойдуларыгар 4 оҕоломмуттара.

1965    с. кэргэнин үлэтинэн сибээстээн Модут нэһилиэгэр көһөн кэлбиттэрэ. Кэргэнэ Николай Иванович 1965 с. күһүн М. Аммосов аатынан колхоз парткомун босхоломмут секретарынан быыбарданан киирбитэ. Модукка олорор бириэмэтигэр 1 сыл медпууҥҥа сиэстирэлээбитэ.

1966    с. Хатырыкка көһөн кэлэллэр. Онтон ылата 40-ча сыл ханна да халбарыйбакка Хатырыкка олорбуттара. Маҥнай 1 сыл устата завхоһунан үлэлиир, онтон 1968 с. Намнааҕы 1 сыллааҕы медицинскай сиэстирэлэр курстарыгар үлэлии - үлэлии үөрэнэн 1970 с. балаҕан ыйыгар бүтэрэн орто үөрэхтээх медсестра идэтин ылар. Уонна 2000 сылга дылы бочуоттаах сынньалаҥҥа тахсыар диэри үлэлээбитэ. Онон барыта 37 сыл медсестранан, ол иһигэр Хатырыкка 30 сыл үлэлээбитэ. Балыыһа коллективын председателинэн 4 сыл талылла сылдьыбыта. Кини балыыһаҕа өр сыллаах үлэтэ улуус киин балыыһатын, доруобуйа харыстабылын министерствотын, улуус дьаһалтатын баһылыгын Бочуотунай грамотатынан бэлиэтэммитэ.

1978 с. Коммунистичсскай үлэ ударнигын аатын ылбыта.

1976-1981 сс. нэһилиэк дьахталларын сэбиэтин председателэ, оройуоннааҕы дьахталлар сэбиэттэрин чилиэнэ.

1975-1977 сс. уонна 1977-1979 сс. Хатырык нэһилиэгин сэбиэтин депутатынан, исполком чилиэнинэн талыллан үлэлээбитэ.

Елизавета Васильевна 10 оҕону төрөтөн, иитэн, улаатыннаран, барыларын үөрэттэрэн, үлэһит ыал оҥортоото. Кинилэртэн 7 оҕо үрдүк, 3 оҕо орто анал үөрэхтээхтэр.

2004 с. бэс ыйыгар Н.И.Сивцевтыын бииргэ олорон ыал буолбуттарын 50 сыллара туолуутун кыһыл көмүс сыбаайбаларын бэлиэтээбиттэрэ. Нам улууһун “Бастыҥ дьиэ-кэргэттэрин” бочуотун кинигэтигэр киллэриллибиттэрэ.

Елизавета Васильевна 1974 с. Герой Ийэ бочуоттаах аатын ылан «Герой Ийэ» орденынан наҕараадаламмыта.

1986 с. Дьокуускай куоракка Тихэй океан регионнарын Азия социалистическай дойдуларын (КНДР, Лаос, Вьетнам, Кампучия, МНР, ССРС) делегацияларын көрсүһүүлэрин кыттыылааҕа.

1993 с. «Махталлаах Саха сирэ - Герой ийэлэргэ» акция кыттыылааҕа буолан, Лена өрүс баһыгар тиийэ устубута. Дьокуускайга Саха Республикатын бастакы президенэ М.Е.Николаев приемугар сылдьыбыта.

Хатырык балыыһатын самодеятельноһын актыыбынай кыттыылааҕа.

Уһун сыралаах үлэтэ:

1985 с. - «Үлэ ветерана».

1996 с. - «Аҕа дойду Улуу сэриитигэр 1941-1945 сс. Килбиэннээх үлэтин иһин», «Кыайыы 50 сыла» мэтээллэр.

2001 сылга Нам улууһун актыбыыс дьахталларын Бочуотун кинигэтигэр аан маҥнай киллэриллибитэ.