Николай Тарскай аатынан Спорт дыбарыаһа аһылынна
Балаҕан ыйын 4 күнүгэр Уус Алдан улууһун киинигэр, Бороҕоҥҥо биир дойдулаахпыт, Саха сиригэр физкультурнай хамсааһыны олохтообут, көҥүл тустууну төрүттээбит Николай Николаевич Тарскай аатынан Спорт дыбарыаһа үөрүүлээх быһыыга-майгыга аһылынна.
Бу бэлиэ тэрээһиҥҥэ С.С. Васильев-Борогонскай аатынан киин библиотека, Сэһэн Ардьакыап аатынан улуустааҕы история уонна кыраайы үөрэтэр түмэл, М. К. Федорова аатынан олохтоох библиотека уонна Н.Н. Тарскай аатынан "Спорт албан аатын" түмэлэ кыттыһан "Жизнь, отданная спорту" диэн Н.Н. Тарскай олоҕун, үлэтин билиһиннэрэр быыстапка турда. Ыраахтан-чугастан тоҕуоруһа мустубут ыалдьыттар быыстапканы сэргии көрдүлэр, бэйэлэрин баҕа санааларын эттилэр.
Эһиил 2024 с. Николай Тарскай төрөөбүтэ 100 сылын бэлиэтиэхпит. Үбүлүөйдээх сылга өссө да элбэх матырыйаал оҥоһуллан, быыстапка ис хоһооно хаҥатыллан турарын илэ хараххытынан көрүөххүт, истиэххит.
