Баатаҕайга Геройдар күннэрэ
Балаҕан ыйын 25 күнүгэр нэһилиэкпитигэр Геройдар күннэрин бэлиэтээтибит. Бу күн улуустааҕы кииннэммит библиотека тиһигэ бэлэмнээбит радиорепортаһын бүттүүн нэһилиэгинэн иһиттибит. Нэһилиэк эдэр, орто, аҕам саастаах дьоно Геройдары ытыктаан, чиэстээн, кинилэргэ сүгүрүйэн түмсүүлээхтик кыттыыны ыллыбыт.
Тэрээһиммит Россия Геройа, 1936 с. Баатаҕайга "Биэттэ" холкуоска кэлэн учууталлаабыт М.М. Стрекаловскай мемориальнай дуоскатын аттыттан саҕаланна. Улууска Геройдар күннэрин, Россия Геройа Стрекаловскай М.М. тустарынан иһитиннэриини оҥордо олохтоох библиотека сэбиэдиссэйэ Пермякова А.П. Герой үтүө аатыгар сүгүрүйэн, махтанан кини дуоскатыгар сибэкки дьөрбөтүн уурдулар: "Алгыс" аҕа көлүөнэ чилиэнэ Готовцева Н.В., орто оскуола историяҕа учуутала Готовцев А.А., орто оскуола үөрэнээччилэрэ Сивцев Кирилл, Тимофеева Натали. Ол кэннэ кыралыын-улаханныын бары Кыайыы болуоссатыгар субботникка кытыыны ыллыбыт. Манна өйдөбүнньүк уоту уйгу сирэ Уус Алдан 9 Геройдарын Албан ааттарыгар уматтыбыт, тэрилтэлэринэн хас биирдии Геройга мас олоттубут.
