Саха НКИХ "Кэрэ кэпсээн" биэриитигэр ыалдьыттаатыбыт
Бу дьыл олунньу 8 күнүгэр Саха НКИХ күөх экранынан көрдөрбүт "Кэрэ кэпсээн" биэриитэ кыраайы үөрэтээччи, фольклорист, Ем. Ярославскай аатынан кыраайы үөрэтэр түмэл үлэһитинэн үлэлээбит биир дойдулаахпыт Иван Георгиевич Березкин төрөөбүтэ 110 сылыгар ананан таҕыста. Телепередача ыытааччыта Тамара Игнатьева ыҥырыытын ылынан кыттыыны ылан кэллибит.
"Кэрэ кэпсээн" биэрии ааттыын да кэрэ. Үйэлээҕи оҥорбут, сурукка тиспит, бастыҥ дьон, кэрэ кэпсээн туһунан сырдатар биэриигэ Иван Георгиевич диэн кимин, хантан төрүттээҕин, тугу үлэлээбитин, туох үтүөлээҕин бэлиэтээн үбүлүөйдээх сылыгар кини туһунан бүтүн республикабытыгар сырдаттыбыт. Манна кыттыыны ыллылар ииппит уола, суруйааччы, үтүөлээх быраас Валентин Егоров, историческай наука кандидата Пантелеймон Петров, Ем. Ярославскай музейга бииргэ үлэлээбит коллегата Василий Борисов, Биир дойдулаахтара Баатаҕай библиотекатын сэб. Августина Пермякова уонна Саха Республикатын Национальнай библиотекатын библиотекара Туяра Готовцева. Кылгас кэм иһигэр бэрт истиҥник, сэргэхтик сэһэргэстибит, кэпсэттибит. И.Г. Березкин суруйан халларбыт кинигэлэринэн быыстапка турда. Билбэтэхпитин биллибит, инники соруктары сүбэлэстибит. Биэриини Саха НКИХ куцйаар ситимигэр булан көрүөххүтүн сөп.
