И.Е. Винокуров 130 сылынан Нам улууһугар экскурсияларга сырыттыбыт
М.К. Федорова аатынан Баатаҕай олохтоох библиотекатын иһинэн үлэлиир "Эйгэ" түмсүү кулун тутар 3 күнүгэр ыаллыы сытар Нам улууһун түмэллэригэр, Хамаҕатта нэһилиэгин библиотекатыгар экскурсияларга сылдьан кэллибит. Бу сырыыбытын СӨ култуура, саха норуотугар улахан өҥөлөөх, уһулуччулаах салайааччы И.Е. Винокуров төрөөбүтэ 130 сылларыгар туһааннаан тэрийдибит.
Экскурсиябытын Хатыҥ-Арыы нэһилиэгиттэн, И.Е. Винокуров төрөөбүт дойдутуттан, кини аатынан түмэлтэн саҕалаатыбыт. Түмэл үлэһиттэрэ биһигини үөрэ көрсөн, киэн туттар киһилэрин Илья Винокуров олоҕун, үлэтин, үтүөтүн, нэһилиэктэрин историятын, олорон ааспыт дьоннорун, сэдэх экспонаттарын туһунан билиһиннэрдилэр. Ол кэннэ Нам улууһун П.И. Сивцев аатынан история уонна этнография түмэлигэр ыалдьыттаатыбыт. Түмэл икки этээһинэн хас даҕаны экскурсионнай саалаларыгар сырыттыбыт, улуус төрүттэммит историятыттан биир-биир ураты саалалар арыллан истилэр. Киэн туттар дьоннорун, кинилэр тустарынан кинигэлэри, экспонаттары, улуус территориятыттан булуллубут хаһыылары, докумуоннары, былыргы олохпутун билиһиннэрэр экспонаттары, таксидермиянан оҥоһуллубут кыыллары, көтөрдөрү олус биһирии, кэрэхсии көрдүбүт. Хайдах эрэ түмэллэргэ сылдьан биир дойдулаахтарбыт, сорохтор аймахтарбыт, өбүгэлэрбит тустарынан үгүһү биллибит, кинилэр мөссүөннэрэ дьон хараҕар хатанан туралларыттан астынныбыт. Былыргыттан да Нам уонна Уус Алдан улуустара быстыбат ситимнээхпит, силистээхпит.
Күн иккис аҥарыгар хас да сылтан бэттэх иитиэхтии сылдьыбыт баҕабытын толорон Хамаҕатта нэһилиэгин библиотекатыгар ыалдьыттаатыбыт. Библиотека сэб. Марина Саввична, нэһилиэк уопсастыбаннай хамсааһынын көҕүлээччи, сүрүннээччи Оротоо Сандаара Саха Аар кыыһа уонна араас түмсүүлэр чилиэттэрэ биһигини үөрэ көрүстүлэр. Остуол тула олорон нэһилиэктэрбитигэр үлэлиир хамсааһыннарбытын, дьарыктарбытын билиһиннэрдибит. Олохтоох дьон түмсүүлэринэн тэттик үлэлэрин быыстапкаларын сырдаттылар, улууска ааспыт сыл түмүгүнэн уопсастыбаннай хамсааһыннар кэккэлэригэр ылбыт, ситиспит сэмэй ситиһиилэрин кэпсээтилэр. Киһи киһиттэн үөрэнэр диэн мээнэҕэ этиллибэт, дьон үлэтин опытын көрөммүт, истэммит бэйэбитигэр туһалааҕы иҥэриннибит диэн түмүккэ кэллибит.
Хас биирдии сылдьыбыт тэрилтэлэрбитигэр, экскурсоводтарбытыгар Баатаҕай сиригэр - уотугар үүнэр сэлиэһинэй бурдугун бэлэх ууннубут. Нам улууһун түмэлэ биһиги библиотекабытыгар поэт, суруйааччы И.Д. Винокуров - Чаҕылҕан үс томнаах саҥа кинигэлэрин, Хамаҕатта библиотеката нэһилиэккэ дьахтар хамсааһынын туһунан сырдаппыты кинигэлэрин, биир дойдулаахпыт М.Н. Аманатова бэйэтин туһунан сырдатыллыбыт "Үйэ" сурунаалы ааҕааччыларбытыгар бэлэх ууннулар. Инникитин да бэйэ-бэйэбитигэр сылдьыһар, истиҥ сыһыаны олохтуур соруктары туруордубут. Аныгыскы сырыыга улуус киин библиотекатын, М.К.Аммосов аатынан СӨ судаарыстыбаннаһын түмэлин көрөр баҕалаахпыт.
