Өрөгөй күнэ!
Бу дьыл муус устар 27 күнүгэр - Саха Өрөспүүбүлүкэтин 100 сыллаах өрөгөйдөөх күнүн бэлиэтээтибит. Баатаҕайдааҕы С.Ф. Сивцев аатынан норуот айымньытын киинигэр нэһилиэкпит олохтоохторо, ыалдьыттара Саха автономията тэриллибитэ 100 сылын бэлиэтиир дьоро түһүлгэҕэ муһуннубут.
Сэбиэскэй Саха сирин бастакы салайааччылара – биллиилээх судаарыстыбаннай уонна бэлитиичэскэй деятеллэр саҥалыы уопсастыбаны тутууну, интеллектуальнай кыаҕы, экэниэмикэни, үбү-харчыны, култуураны, билим төрүтүн түстээбитч улуу дьоммут тустарынан, өрөспүүбүлүкэбит 100 сыл иһигэр сайдар кэскиллээх олоҕун кэпсиир, көрдөрөр выставка турда, нэһилиэк талааннаах дьонун эҕэрдэ концерын көрдүбүт, илии-илииттэн ылсыһан оһуохайдаан ойдубут.
Өссө төгүл күндү ааҕааччыларбытын барыгытын ис сүрэхпититтэн Өрөспүүбүлүкэбит 100 сыллаах үбүлүөйүнэн эҕэрдэлиибит! Саха омук - улуу омук. Субуллар мындыр өйдөөх, үтүө көнө майгылаах, сатабыллаах, үүнэр-сайдар кэскиллээх!
