Уруйдуубут Улуу Кыайыы 77 сылын!
Ыам ыйын 9 күнүгэр кэриэстиибит кыргыс толоонугар охтубуттары, олохторун толук уурбуттары, төрүт дойдуларыгар төннүбэтэхтэри. Кыайыы күнүгэр чиэстиибит өстөөҕү өһөрөн кыайбыттары, этэҥҥэ эргиллэн кэлбиттэри, хаарыан дьоннорун сүтэрэннэр харах уутунан сууммуттары.
Баатаҕай нэһилиэгэр бу күн нэһилиэк олохтоохторо, кыралыын-улаханнык тоҕуоруһа муһуннулар. Хорсун саллааттарбыт, кыайыыны уһансыбыт дьоммутугар сүгүрүйэн, махтанан "Өлбөт үйэлээх полканы" өрө тутан сэлэлээн хаамтыбыт.
Биһиги нэһилиэкпитигэр 2 тыыл ветерана, 8 сэрии комин оҕолорор олороллор. Нэһилиэк аҕа баһылыга М. М. Белолюбскай Улуу Кыайыы 77 сылынан дьонун-сэргэтин эҕэрдэлээтэ, тыыл ветераннарыгар, сэрии кэмин оҕолоругар дьаһалта, тэрилтэ салайааччылара бэлэхтэри туттартаатылар. Өр сылларга нэһилиэк аҕа саастаахтарын салайбыт Анна Петровна Бурнашева бэйэтин эҕэрдэтин эттэ, ону тэҥэ кэлиҥҥи сылларга тахсыбыт сэрии сылын оҕолорун, тыыл үлэһиттэрин туһунан кинигэлэри билиһиннэртээтэ. "Аргыс" арҕаа түөлбэ дьахталлара, мустубут дьону арыылаах алаадьынан, гречка хааһынан, итии чэйинэн күндүлээтилэр. С. С. Васильев-Борогонскай төрөөбүтэ 115 сылынан, биир кэлим күргүөмүнэн ааҕы биллэриллэн, Сергей Борогонскай "Кыайыы ырыата" хоһоонун мустубут дьон бары аахтылар.
Үрүҥ күн, эйэ, дьол иһин охсуспут, өрөгөйдөөх кыайыыны аҕалбыт, сырдык олоҕу түстээбит ытык дьоммут – ветераннарбыт сырдык мөссүөннэрин өрө тутаммыт өйдүү-саныы, сүгүрүйэ, Албан ааттарын үйэтитэ, мэлдьи эдэр, Герой буолан хаалбыт буойуттарбытынан үйэлэргэ киэн тутта сылдьыаххайыҥ!
