Н. Н. Тарскай аатынан турнир
Тохсунньу 12-14 күннэригэр Дьокуускай куоракка Саха сиригэр спорду көҕүлээбит, биллэр государственнай деятель, биир дойдулаахпыт Н.Н. Тарскай аатынан, оскуола саастаах уолаттарга, тустууга күрэх ыытылынна. Бу күрэххэ 17 улуустан барыта 293 күрэхтэһээччи кытынна. Күрэх Баһылай Манчаары аатынан национальнай көрүҥнэри тарҕатар киин киэҥ уораҕайыгар тэрилиннэ.
Тумус туттар чулуу киһибит Николай Николаевич Тарскай олоҕун уонна үлэтин билиһиннэрэр Баатаҕайтан "Спорт Албан аата" музей матырыйаалларын, олохтоох библиотекаҕа баар кинигэлэри быыстапкалаан туруордубут, кэскиллээх спортсменнарга билиһиннэрдибит. Тренердэр, тустууктар, кэлбит ыалдьыттар быыстапканы сэргии, сэдэх матырыйааллары кэрэхсии көрдүлэр. Бэлиэтээн этэр эбит буоллахха, Н.Н. Тарскай биһиги нэһилиэк, улуус эрэ киэн туттар киһитэ буолбатах, кини бүтүн Республикабыт киэн туттуута буолар.
Санатар эбит буоллахха, эһиил 2024 сылга Н.Н. Тарскай төрөөбүтэ 100 сылын бэлиэтиэхпит. Онно аналлаах бэлэмнэнии үлэлэр саҕаланнылар.
