Аатын киэн тутта ааттыыбыт!
Бүгүн, алтынньы 29 күнүгэр Баатаҕайдааҕы "Күнчээн" уһуйаан орто уонна улахан бөлөҕүн иитиллээччилэригэр ученай-историк, Аҕа дойду сэриитин чинчийбит, үөрэппит биир дойдулаахпыт Петров Дмитрий Дмитриевич туһунан бэсиэдэ ыытылынна. Билиҥҥи кэм балаһыанньатынан, көрдөһүүбүтүн быһа гыммакка, уһуйаан иитээччитэ Светлана Ивановна Готовцева иилээн-саҕалаан ыытта.
Кырачаан оҕолорбут ученай-историк Дмитрий Дмитриевич олоҕун, үлэтин кытары билистилэр, хаартыскаларын көрдүлэр, иһиттилэр. Оҕолорбутугар инникитин үтүө холобурдаах биир дойдулаахтарын туһунан өссө чиҥэтэн үөрэтэллэригэр, кини курдук наукаҕа, дойдуларыгар туһалаах дьон буолан тахсалларыгар баҕарабыт. Кинилэргэ анаан М. К. Федорова аатынан олохтоох библиотека Петров Д.Д. туһунан анал матырыйаалы оҥорон уһуйаан түмэлигэр бэлэхтээтэ.