Готовцева Мария Егоровна

Информация о материале
Опубликовано: 16.05.2022 11:14
Просмотров: 191

Биһиги ийэбит, Мария Егоровна 1927 сыл Нам оройуонугар төрөөбүтэ. Аҕата Нам Аппаанытыттан төрүттээх Винокуров Дорофей, ийэтэ Нам Көбөкөнүттэн төрүттээх Барамыгина Мария Ионовна диэннэр.

Ийэбит бииргэ төрөөбүттэрэ: Винокуров Илья Дорофеевич –Чаҕылҕан – суруйааччы, Александра, Марина, Евдокия эдьиийдэрэ, кыра убайа Михаил.

Биһиги ийэбит саамай кыралара, кинини оҕолонон баран ийэтэ сыыстаран 4 хонон баран өлбүт. Онон оҕолор аҥардас аҕаларыгар хаалаллар. Онон ийэбитин таайа Барамыгин Егор Ионович ылан иитэр. Онон Мария Барамыгина Мария Егоровна буолар, Көбөкөҥҥө иитиллэр. 4 кылааһы Көбөкөҥҥө, 7 кылааһы Намҥа оройуон киинигэр бүтэрэр.

1943 сэрии сылларыгар таайа өлөн, ииппит ийэтэ хараҕынан көрбөт буолан сут-кураан, ас-таҥас тиийбэт кэмэ бүрүүкээн салгыы кыайан үөрэммэтэҕэ. Көбөкөҥҥө колхозка хонуу үлэтигэр, сүөһү иитиитигэр күүһэ кыайарынан үлэлээн-хамсаан ииттинэн олорбуттара. 1947 сыл Уус-Алдан оройуонун, Баатаҕай нэһилиэгин ыччатыгар Готовцев Яков Андреевичка кэргэн тахсан ыал буолар. Баатаҕайга Жданов аатынан колхозка сүөһү үлэтигэр доярканан, онтон элбэх оҕолонон баран үүт учуотчутунан, араас үлэлэргэ үлэлиир. 1977 с. пенсияҕа тахсыбыта.

Ийэлээх аҕабыт 14 оҕону: 12 уол, 2 кыыс төрөтөн улахан ыал буолтара. 2 уол кыра саастарыгар өлбүттэрэ. Атын оҕолор улаатан, үөрэнэн, араас идэлээх кадрдар буолан норуот хаһаайыстыбатын арас салаа үлэлэригэр үлэлии сылдьаллар, бары олохторун булбут ыаллар.  Онон, дьоммут улахан дьиэ кэргэн эбээтэ, эһээтэ буолаллар.

Ийэбит “Медаль материнства I, II степени” мэтээллэринэн, “Материнская слава I, II, III степеннээх” орденнарынан наҕараадаламмыта.  1967 сыл от ыйыгар “Мать-Героиня” орденынан наҕараадаланан Герой Ийэ үрдүк аатын сүкпүтэ.

Ийэбит элбэх оҕолоох ийэ буоларын быһыытынан эйэҕэс, элэккэй, сымнаҕас майгылаах этэ, оҕолорун кыра эрдэхтэриттэн үлэҕэ сыстаҕас, дьиэ ис-тас үлэтигэр такайан үөрэппитэ, үөрэххэ-олоххо дьулуурдаах дьон буолан иитиллэн тахсыбыттара. Кини 1988 с. ыарахан ыарыыттан биһиги кэккэбититтэн суох буолта.

Ахтыыны суруйда кыыһа

Мария Яковлевна Пермякова, Уус Алдан улууһа, Баатаҕай н.