Готовцев Прокопий Прокопьевич
- Информация о материале
- Опубликовано: 24.01.2022 14:44
- Просмотров: 1198
1947
Прокопий Прокопьевич 1947 сыл кулун тутар 8 күнүгэр Уус-Алдан opoйуонун Баатаҕай нэһилиэгэр Биэттэ эбэ халдьаайытыгар колхозтаах дьиэ кэргэ төрөөбүтэ. Аҕата Готовцев Прокопий Данилович 1903 сыллаах төрүөх, aҕатын бииргэ төрөөбүтгэрэ Ульяна Даниловна - Саха АССР Верховнай Совстын депутата этэ, Гавриил Данилович колхозтаах, Екатерина Даниловна ыанньыксыт этэ.
Ийэтэ Сивцева Ольга Петровна 1922 с. төрүөх, олохтоох Үөнэ аҕатын ууһуттан төрүттээх Прокопий бииргэ төрөөбүттэрэ, эдьиийдэрэ Мария, Екатерина Намҥа кэргэн тахсан онно олохсуйбуттара.
Оҕо сааһа сэрии кэннинээҕи олоҕу чөлүгэр түһэрии сылларыгар ааспыттара, онон бэйэтин көлүөнэ оҕолорун курдук колхоз үлэтигэр, сайынын алаастарынан от үлэтигэр сылдьара. Оскуолатааҕы сыллара Чараҥай 7 кылаастаах, Дүпсүн орто оскуолатыгар ааспыттара. Оскуола кэнниттэн Чэриктэй аҕыс кылаастаах оскуолатыгар физкультура уонна химия учууталынан үлэлээбитэ.
1973 сыл Тбилиси куоракка Грузинскай Государственнай физическай культура институтун ситиһиилээхтик үөрэнэн бүтэрэн физкультура учууталын идэтин ылар.
Онтон ыла олоҕун үтүө сылларын Республикаҕа спорт уонна эдэр ыччаты эт-хаан өттүнэн сайыннарыы физкультурнай хамсааһыҥҥа анаабыта. Кини ханна да үлэлээбитин иһин бэйэтигэр уонна бииргэ үлэлиир табаарыстарыттан үрдүк ирдэбиллээҕинэн уратылааҕа, саҥа саҕалааһыннарга айымньылаах сыһыанынан идэтигэр толору бэлэмнээх кадрынан биллэрэ. Дьокуускайдааҕы 1 №-дээх педучилищеҕа үлэлиир сылларыгар учуутал быһыытынан элбэххэ үөрэнэн буһууну-хатыыны ааспыта.
Студеннары туһааннаах идэлэригэр бэриниилээх, ис дууһаттан ылсан үлэлииргэ, саҥаттан саҥа ньымалары-көрүҥнэри киллэриигэ бэйэ наабыктарын сылтан-сыл тупсаран иһиигэ ис дууһатыттан такайан үөрэппитэ. Ол иһин кини иитиллээччилэрэ учууталларын холобурун батыһан норуот хаһаайыстыбатын араас үлэлэригэр ситиһиилээхтик үлэлии сылдьаллар, норуот, дьон-сэргэ убаастыыр, үрдүк квалификациялаах специалистара уонна салайааччылар буолан үлэлии сылдьаллар.
Прокопий Прокопьевич чэпчэки атлетикаҕа, национальнай көрүннэргэ специалист быһыытынан, бу көрүҥнэр сайдыыларыгар элбэх сыратын, кылаатын киллэрэн сайыннарда, тупсарда. Саха национальнай ыстаныыларыгар 19 маастардары, Россия, Сибиир, Дальнай Восток элбэх чемпионнарын, рекордсменнарын, призердарын иитэн таһаарда.
Ол иһин 1981 сыл киниэхэ “Саха АССР үтүөлээх тренерэ” диэн үрдүк аат иҥэриллибитэ.
1986-87 сс. Дьокуускай куорат Октябрьскай оройуонун үөрэхтээһиҥҥэ отделын инспекторынан өрө таһаарыылаахтык үлэлиир. 1987 сыл саҥа тэриллибит профсоюзтар физкультураҕа уонна спортка обществоларын тыа хаһаайыстыбатын үлэһиттэрин комплексыгар отделын сэбиэдиссэйинэн ананан үлэлиир.
1992 сыл Саха Республикатын «Урожай» физкультурнай, спортивнай обществотын Республикатааҕы Советын председателинэн талыллар. Бу сыл кини көҕүлээһининэн уонна идеятынан «Саха төрүт оонньууларыгар» маҥнайгы культурнай-спортивнай фестиваль ыытыллыбыта. Мантан ыла спортка Саха национальнай оонньууларын бары көрүҥнэрэ күүскэ сайдан барбыттара, ол курдук “ыарахан тааһы көтөҕүү”, “Боотурдар оонньуулара”, «Тыгын оонньуулара», норуот “Остуолга оонньуулара” республикаҕа эрэ буолбакка, Россияҕа тиийэ биллэр буоллулар.
1994 сыл кини салайааччы, иитээччи быһыытынан дьыалабыай качестволарын үрдүктүк сыаналаан Саха Республикатын ыччакка, туризмҥа, физкультураҕа уонна Спортка Министерствотын солбуйар министринэн өрө таһаарыллар. Бу сылларга Российскай Федерация «Урожай» обществотын Киин Советын Президиумун уонна пленумун чилиэнинэн талыллар. 1995 сыл Аҕа Дойду сэриитигэр Кыайыы 50 сылыгар аналлаах Бүтүн Россиятааҕы Тыа сирин спортивнай оонньууларын Волгоград куоракка тэрийэн ыытар комитет чилиэнинэн талыллар.
1998 сыл Республикатааҕы спортивнай чэбдигирдэр холбоһук директорын солбуйааччынан, сүрүннүүр специалиһынан «Самородок» комплекс спортивнай тренеринэн ананан үлэлиир.
2003 сылтан Саха Республикатын «Урожай» физкультурнай, спортивнай Обшествотын председателинэн талыллан тыа сиригэр доруобай, чөл олохтоох, үрдүк культуралаах олох сайдарыгар элбэх өрүттээх үлэни ыытан үлэлээбитэ.
Кини тэрийэр талаана республикаҕа, Россияҕа ыытыллар Тыа cирин спортивнай оонньуулара, «Төрүттэр оонньуулара», Баһылай Манчаары бирииһигэр спорт национальнай көрүҥнэригэр Спартакиадаҕа, Хотугу норуоттар спортивнай оонньууларыгар, «Азия оҕолоро» диэн Аан дойду үрдүнэн ыытыллар оҕолор спортивнай оонньууларын бэлэмнээһиҥҥэ, тэрийэн-салайан ыытыыга күүс-көмө буолтара.
Бүтүн Россиятааҕы категориялаах судьуйа буоларынан оройуоннай, куораттааҕы, республиканскай, Российскай, ону ааһан Союз үрдүнэн ыьтыллар күрэхтэһиилэргэ кылаабынай судьуйа, судьуйа быһыытынан салайан, тэрийэн ыытыспыта.
Прокопий Прокопьевич уһун сыралаах үлэтэ олохтоох салалтанан уонна Правительствонан үрдүктүк сыаналаммыта, кини олоҕун түөһүн киэргэтэллэр:
- 1981 сыл Саха АССР Үтүөлээх тренерэ.
- «Российскай Федерация, Саха Республикатын физкультураҕа уонна спортка сайдыытыгар үтүөлэрин иһин» - Бочуот знактардаах
- 1998 сыл Саха Республикатын Физическай культураҕа Үтүөлээх үлэһитэ
- 2000 сыл Саха Республикатын XX үйэҕэ спортка Лауреата.
- 2004 сыл Уус-Алдан оройуонун Бочуоттаах олохтооҕо.
- 2005 сыл «Саха ВА» спортка Бочуоттаах маастара.
- 2006 сыл СР «Урожай» ФС обшествотын Бочуоттаах үлэһитэ.
- 2006 сыл СР «Гражданская доблесть» знактаах.
- 1995 сылтан Баатаҕай нэһилиэгин Бочуоттаах олохтооҕо.
- 2008 сыл кулун тутар 4 күнүгэр «РФ физическэй культуратын үтүв үлэһитэ» Бочуоттаах аат иҥэриллибитэ.
Прокопий улахан ыал тапталлаах аҕата, эйэҕэс эһээтэ.