Румянцева Ксения Иннокентьевна
- Информация о материале
- Опубликовано: 02.02.2022 11:58
- Просмотров: 1193
1950
Ксения Иннокентьевна 1950 сыллаахха тохсунньу 1 күнүгэр Нам оройуонун Көбөкөн нэһилиэгэр колхозтаах кэргэнигэр төрөөбүтэ. Aҕатa Готовцев Иннокентий Андреевич олохтоох Баатаҕай киһитэ, биригэдьиир, сылгыһыт, булчут этэ. Ийэтэ Барамыгина Ксения Нам Көбөкөнүттэн төрүттээх. Ксения Иннокентьевна бииргэ төрөөбүттэр төрдүөлэр. Баатаҕай 8-с кылаастаах оскуолатын, онтон Найахы орто оскуолатын үөрэнэн бүтэрбитэ. «Оскуола-производство, үрдүк үөрэх» комсомольскай ыҥырыынан 3 сыл устата төрөөбүт -үөскээбит Биэттэтигэр ыанньыксытынан, бороон көрөөччүнэн кыһамньылаахтык үлэлээбитэ.
1 сыл устата ученай Ларионов тэрийбит ааҕар-суоттуур техническай отделыгар техүлэһитинэн үлэлээбитэ. 1973 сыллаахха Саха государственнай университетын саха салаатыгар үөрэнэ киирэр уонна 1978 с. ситиһиилээхтик бүтэрэр. Үөрэҕин бүтэриэҕиттэн Баатаҕай орто оскуолатыгар интернат воспитателинэн, продленнай группа иитээччитинэн, оскуола библиотекаринан, история предметигар, саха тылын уонна литературатын учууталынан бары кыһамнньытын ууран үлэлээбитэ.
1996 сылтан Саха сиригэр көҥүл тустууну төрүттээбит, государственнай деятель, биир дойдулаахпыт Н.Н.Тарскай сырдык кириэһигэр анаан спортивнай музей тэрийэн үлэлэтэр. Бу ааспыт сылларга музей үлэтэ тупсарыгар материалларын хомуйууга олус бэриниилээхтик туруулаһан үлэлээтэ.
Музей иһинэн оскуола үөрэнээччилэригэр “Дьулуур” куруһуок – нэһилиэк историятын, кыраайы үөрэтиигэ, биир дойдулаахтарбыт тустарынан сырдатыыга тэриллэн үлэлээбитэ. Историяны кэпсиир хомуллубут материаллар ис хоһооннорун куруһуок оҕолоро дириҥник үөрэтэн, оҕолор бэйэлэрэ кэпсиир буолтара. Ииппит-үөрэппит оҕолоро, «Дьулуур» куруһуок чилиэннэрэ үрдүк уонна орто үөрэх кыһаларын сииһиилээхтик үөрэнэн, үлэһит буоллулар.
Ксения Иннокентьевна бэйэтин туһааннаах үлэтинэн уонна музейын эйгэтинэн эрэ муҥурдаммакка, нэһилиэк обшественнай олоҕор, төрөппүттэр сэбиэттэригэр, кырдьаҕастар түмсүүлэригэр, кулууп үлэтигэр концертарга активнай кыттыыны ылбыта, ылар. Улууска ыытыллар семинардарга, конкурстарга, cпортивнай күрэхтэһиилэргэ Николай Николаевич Тарскай туһунан выставкалары тэрийэн, кэпсээн дьон-сэргэ биһирэбилин ылбыта. Нэһилиэгэр, үлэлээбит оскуолатын коллективыгар улахан авторитетынан туһанар.
Ксения Иннокентьевна уһун сыралаах үлэтэ үөрэх Министерствотынан, Улуус салалтатынан, олохтоох нэһилиэгинэн үрдүктүк сыаналанан Бочуотунай грамоталарынан, дипломнарынан наҕараадаламмыта.
Учуутал уонна музей салайааччытын быһыытынан үлэтигэр сэмэй ситиһиилэрдээх.
1997 сыл улууска “Үөрэнээччилэри чинчийэр үлэҕэ бастыҥ уһуйааччы” номинациялаах, 1999 сыл физическай культураны, чөл олоҕу пропагандалааһыҥҥа үтүөлэрин иһин Саха Республикатын Правительствотыттан грамоталаах, 1999 сыл “Саха Республикатын үөрэҕириитин туйгуна” буолбута, 2004 сыл Саха Республикатын Ил Түмэниттэн грамоталаах, 2004 сыл Саха Республикатын «Физическай культуратын уонна cпордун сайыннарыыга үтүөлэрин иһин» бочуот знактаах, 2004 сыл «Гражданскай килбиэн» бэлиэ хаһаайката, 2005 с. Баатаҕай нэһилиэгин Бочуоттаах олохтооҕо.