Спортзаллар, площадкалар
- Информация о материале
- Опубликовано: 03.02.2022 16:21
- Просмотров: 1158
Баатаҕай нэһилиэгэр бастакы площадканы Н. Н. Тарскай 1943-45 сс. Чараҥай оскуолатыгар физкультура учууталынан үлэлии сылдьан туттарбыта. Снарядтара сорохторо билиҥҥигэ майгынныыр, сорохторо олох майгыннаабат эбиттэр:
- “Түһүүлээх-тахсыылаах уһун бэрэбинэ” снаряд.
Сүүрэн кэлэн үөһээ тахсан бэрэбинэнэн сүүрэн түһэллэр. Бу снаряд оҕо тирэхтээх буоларыгар наадалааҕа.
- “3 м. уһуннаах баҕаналарга тимиргэ кытаанах быалаах, тимиргэ өйөнүллүбүт кирилиэстээх” снаряд.
Манна быанан ыттан тахсан баран кирилиэһинэн түһэллэр эбит. Бу снаряд оҕо илиитэ үрдүк сиргэ тирэхтээх буоларыгар туһалаах эбит.
- “Үс үүт бүтэй” снаряд.
Маны үрдүнэн ойоллоро, онон-манан киирэллэрэ-тахсаллара. Бу снарядка оҕо сымса, түргэнник толкуйдуура сайдар.
- “Козел” снаряд.
Маны үрдүнэн ойоллор. Бу снаряд оҕо илиитэ-атаҕа тирэҕэ сайдар.
- “Эрийэ-буруйа сүүрэр” снаряд.
Манна оҕо сымса буоларга үөрэнэр.
- “Мас мэһэйдэрдээх дьаама” снаряд.
Маны үрдүнэн эбэтэр мастан үктэнэн ойоллор. Бу снарядка оҕо атаҕа сайдар.
- “Хачыал” снарядтар.
Манна биир өттүнэн сүүрэн тахсаллар, биир өттүнэн сүүрэн түһэллэр. Бу снарядка оҕо тирэхтээх буолууга үөрэнэр.
Улахан, кыра оҕо хачыаллыыр снарядтара. Манна оҕо хачыаллаан мэйиитэ эргийбэт буолар.
- “Тардынар” снаряд.
Бу снарядка оҕо илиитэ сайдар.
- “Мас брустар” снаряд.
Бу снарядка оҕо сиһигэр туһалаах, ону таһынан имигэс буоларга үөрэнэр.
- “Кумахтаах ыстанар сир” снаряд.
Манна оҕо атаҕа сайдар.
- “Гранаталар”.
Гранаталары быраҕан оҕо илиитэ сайдар, эрчимирэр.
Нэһилиэккэ 1974-75 сс. “Космос” диэн ааттаах площадка тэриллбитэ. Онно бааллар этэ:
- Гимнастическай кирилиэс;
- Араас мээрэйдээх перекладиналар;
- Сытыары кирилиэстэр;
- ГТО нормативыгар аналлаах мэһэйдээх сирдэр, бревнолар, дьаамалар, лабириннар;
- 400 м. эргимтэлээх сүүрэр сир;
- Футбол хонуута;
- Волейбол площадката.
Аны тула өттүгэр лиискэ уруһуйдар, плакаттар, стадиоҥҥа киирэр арка барыта ситэ оҥоһуллубута.
Аан маҥнай детсад площадката 1976 с. оҥоһуллубута. Онно веранда, сыыр, теремок, хачыал бааллар эбит.
1981 с. Петров Михаил Прокопьевич “хараабылы” туппут. Ол кэннэ барытын көтүрэн баран саҥалыы 2003 с. параднай аан өттүн Алексеев Николай уонна Аманатов Илья туппуттар. Онно маннык тутуулары оҥорбуттар: сыыр, ураһалар, үөһээ-аллараа тахсар-түһэр кирилиэс, кумахтаах миэстэ.
Нэһилиэккэ 1991 с. икки этээстээх мас спортзал аһыллан үлэҕэ киирбитэ. Бу киэҥ-куоҥ залы Готовцев Федор Иванович салайааччылаах биригээдэ тутан үлэҕэ киллэрбитэ.
Баатаҕай орто оскуолатын иннигэр баар площадканы 2000 с. туппуттара. Бу площадкаҕа бааллар: 30 м. уһуннаах сүүрэр кумах дорожка, лабиринт, перекладиналар, көлүөһэнэн оҥоһуктар, сытыары кирилиэс.
Оскуола үөрэнээччилэрин аҕаларын түмсүүтүн көҕүлээһининэн 2005-2006 сс. эбии сыыр, хачыал, ураһа быһыылаах кумахтаах миэстэлэр, сэргэ оҥоһуллубуттар. Салайааччынан Дмитриев Дьолуо Прокопьевич, көмөлөспүттэр Сивцев Петр Петрович, Гоголев Николай Егорович.
2012 с. “Үтүө дьыала” хамсааһынынан нэһилиэкпитигэр саҥалыы көстүүлээх, оҥоһуулаах спортивнай зал үлэҕэ киирбитэ. Бу сыл күһүнүгэр саҥа залга араас тренажердар ылыллыбыттара, бэлэхтэммиттэрэ.
2014 с. саҥа спортзал аһыллан үлэҕэ киирбитин кэннэ Целевой фонд будущих поколений нөҥүө аныгылыы тупсаҕай спортплощадка кэлбитэ.
2018 с. ППМИ программаҕа олохтоох дьаһалта уонна нэһилиэнньэ киирсэннэр, аныгылыы быһыылаах саҥа спортплощадка ылыллыбыта.