"Баатаҕай баараҕай тиитэ" кинигэ сүрэхтэннэ
Балаҕан ыйын 12 күнүгэр С. Ф. Сивцев аатынан "Түмэн" норуот айымньытын киинигэр Бапатаҕай нэһилиэгэр 18 сыл баһылыгынан үлэлээбит, СӨ муниципальнай сулууспатын туйгуна, СӨ үөрэҕириитин туйгуна Игнатий Петрович Готовцев туһунан "БААТАҔАЙ БААРАҔАЙ ТИИТЭ" кинигэ сүрэхтэннэ. Кинигэ автора - төрөппүт кыыһа Любовь Игнатьевна Готовцева. Любовь Готовцева сэттэ сыл иитиэхтии сылдьыбыт санаатын, быыс-арыт булан бу күн ситэрдэ. Кинигэҕэ уһулуччу кыахтаах, айылҕаттан айдарыылаах, элбэх саҥаны киллэрбит, үлэни ыыппыт саха саарына И.П. Готовцев туһунан арылхайдык ойууланар. Кинигэ уус-уран айымньы курдук суруллубута элбэх киһи сүргэтин көтөхтө.
Үөрүүлээх тэрээһиҥҥэ биир дойдулаахтара, улуус салалтатыттан баһылыгы солбуйааччы Троев И.И., бииргэ үлэлэспит, алтыспыт коллегалара кыттыыны ыллылар. Кинигэ сүрэхтэниитин күтүөтэ Максим Березин иилээн-саҕалаан ыытта. Эҕэрдэ тылынан тэрээһини нэһилиэк баһылыга М.М. Белолюбскай арыйда. Бииргэ үлэлээбит, Игнатий Петровичтан элбэххэ үөрэммит, алтыспыт, оччотооҕуга Тулуна нэһилиэгин баһылыгынан олорбут И.И. Троев бэрт сэргэх ахтыыны оҥордо, кинигэ авторыгар эҕэрдэ суругун туттарда.
Оҕо сааһын кэмнэриттэн Алексей Яковлевич, Анастасия Прокопьевна Готовцевтар дьиэ кэргэн, эдэр сылдьан бииргэ үөрэммит, спордунан дьарыктаммыт доҕотторуттан Михаил Петрович Белолюбскай, үлэ үөһүгэр алтыспыт, үлэлэспит дьонноруттан Вера Иннокентьевна Троева, Саргылана Павловна Гоголева, Николай Николаевич Сивцев, Валерий Иванович Данилов, аймахтар, бииргэ төрөөбүттэр ааттарыттан Татьяна Петровна Белолюбская бэрт истиҥ, сэргэх ахтыылары оҥордулар. Бу түгэҥҥэ мааны куоластаах, саха эстрадатын чаҕылхай сулустара Варя Максима, Бүөккэ Бөтүрүөп, Лэкиэс ылбаҕай ырыаларынан тэрээһини киэргэттилэр.
Түмүккэ автор, Любовь Готовцева бу кинигэтин туһунан эмиэ да курустук, эмиэ да чэпчээбиттии арыллан билиһиннэрдэ. Аҕатын туһунан ахтыылары дууһатын нөҥүө аһардан, быыллыйа турбат гына дьон ааҕарыгар киэркэтэн, тупсаран суруйбутун кэпсээтэ. Бу кинигэ тахсарыгар көмөлөспүт Тумул нэһилиэгин меценатыгар, И.П. Готовцев үөрэнээччитигэр П.С. Алексеевка, аймахтарыгар истиҥник махтанна.
Баатаҕайдар кыыстарыгар Любаҕа айар талаана өссө кэҥээн, суруйар дьоҕура суруйааччы аатын ыларыгар баҕа санааларын эттилэр. Игнатий Петрович кэргэнигэр, оҕолоругар, сиэннэригэр махтаннылар, аҕаларын, эһэлэрин аата үйэтитиллибититтэн астыннылар. Инникитин да бииргэ буоларга, саҥаны толкуйдаан чулуу киһи аатын үйэтитиигэ үлэни ыытарга санааларын эттилэр.