"Төрөөбүт тыл сүмэтин иҥэринэн" кинигэ сүрэхтэниитэ
Бу дьыл от ыйын 24 күнүгэр РСФСР норуотун үөрэҕириитин туйгуна, СӨ учууталларын учууталлара, Баатаҕай нэһилиэгин бочуоттаах олохтооҕо Римма Иннокентьевна Бурцева төрөөбүт нэһилиэгин, улууһун киэн туттар дьонун туһунан хаһыаттарга бэчээттэммит ыстатыйалара, суруйуулара, кинигэлэргэ тахсыбыт ахтыылара, ону таһынан үөрэнээччилэрин айымньылара түмүллэн кинигэ буолан тахсыбытын бэлиэтээтибит.
Римма Иннокентьевна аан бастаан 1986 с. оройуон хаһыатыгар бастакы ыстатыйатын бэчээттэппитэ. Онтон ылата суруйар, бэлиэтэнэр дьоҕура сайдан, тупсан испитэ. Баатаҕай орто оскуолатыгар үлэлиир кэмигэр алын сүһүөх кылаас үөрэнээччилэригэр, айар дьоҕурдаах оҕолорго анаан "Үнүгэсчээн" бөлөҕү тэрийэн, ордук табыллыбыт ыстатыйалары, айымньылары "Мүрү саһарҕата", "Кэскил" хаһыаттарга бэчээттэтэри тэрийбитэ. Кини, автор быһыытынан, бу иккис кинигэтэ. Маны таһынан орто оскуола историятын кэпсиир уонна нэһилиэк бастыҥ дьонун сырдатар кинигэлэр соавтордара.
Кинигэ сүрэхтэнэр күнүгэр ахтыы биэрбит, сырдаппыт дьоно кэлэн кыттыыны ыллылар, эҕэрдэ тылларын эттилэр. Үөрүүлээх түгэни бэйэтин ылбаҕай ырыатынан Анастасия Васильева киэргэттэ. Автор аймахтара, дьүөгэлэрэ, үлэлээбит оскуолатын аатыттан директор Бурнашева А.А. бэйэлэрин ахтыыларын оҥордулар. 10 түһүмэхтэн турар кинигэ баай ис хоһоонноох. Ыалдьыттарга анаан хас түһүмэх аайы автор тургутар боппуростары биэрэн аралдьытта. Тэрээһин кыттыылаахтара Римма Иннокентьевнаҕа өссө да айымньылаах үлэни, кытаанах доруобуйаны баҕардылар.
