"Алгыс" аҕа түмсүү отчуота
Балаҕан ыйын 26 күнүгэр нэһилиэкпитигэр саамай тахсыылаах үлэлээх, үгүс ситиһиилэрдээх "Алгыс" аҕа көлүөнэ түмсүүтүн 18 сыл устата салайбыт Анна Петровна Бурнашева үлэтин түмүктүүр отчуоттуур киэһээтэ буолан ааста. Бу күн республикабыт, улууспут араас муннуктарыттан бьииргэ алтыспыт доҕотторо, үөлээннээхтэрэ, нэһилиэкпит дьоно-сэргэтэ муһунна.
Анна Петровна Баатаҕай нэһилиэгэр ветераннар Сэбиэттэрин председателинэн үтүө суобастаахтык, биир-биэс харчыта суох үтүө суобастаахтык үлэлээтэ. Ханнык баҕарар түгэҥҥэ, хайа баҕарар балаһыанньаҕа сөптөөхтүк толкуйдаан, сүүрэн-көтөн, булан-талан, кырдьаҕастарыгар хас биирдиилэригэр болҕомто ууран, араас күрэхтэргэ кытыннаран, сынньалаҥнарын тэрийэн бэрт элбэх үлэни ыытта.
Бу күн "Алгыс" аҕа көлүөнэ түмсүүтүгэр 18 сыл усталаах-туоратыгар туох үлэни ыытан, ханна, тугу ситиспитин билиһиннэрэр "Салайбыт үлэм ситиһиилэрэ" диэн бэрт истиҥ быыстапканы туруоран билиһиннэрдэ. Быыстапкаҕа араас сылларга үлэлээбит үлэтин хаартысканан, ситиспит ситиһиилэрин кубоктара, эҕэрдэлэр турдулар. Общественнай үлэҕэ сыстан нэһилиэк, улуус көҕүлээбит проектарын билиһиннэрдэ, бииргэ үлэлэһии түмүгэр тахсыбыт кинигэлэри көрдөрдө.
Тэрээһин үөрүүлээх чааһыгар үгүс ыалдьыт, нэһилиэк тэрилтэлэрэ, олохтоохторо эҕэрдэ уонна махтал тылларын эттилэр. Ол кэннэ нэһилиэк аҕам саастаахтара саҥа бэрэссэдээтэли талыыга быыбарга кытыннылар. "Алгыс" аҕа көлүөнэ түмсүүтэ, "Сандаар" ырыа ансамбла тэрээһини бэйэлэрин ырыаларынан, үҥкүүлэринэн киэргэттилэр.
