Н.Н. Тарскай аатынан Баатаҕай орто осколатын үбүлүөйдээх 95 сыла!
Алтынньы 5 күнэ - Учуутал күнэ. Бу күн Баатаҕай нэһилиэгэр сырдыкка-кэрэҕэ уһуйбут, үөрэх-билии акылаатын уурбут үөрэммит кыһабыт төрүттэммитэ 95 сылын бэлиэтээтибит. "Оскуола - оҕо саас биһигэ" диэн ааттаан үөрэммит кыһабытыгар аһаҕас аан күнэ тэрилиннэ. Бэлиэ күн сүрүн соруга - оскуолабыт 100 сыллаах үбүлүөйүгэр бэлэмнэнии, онно туһааннаах хайысхалары сөргүтүү диэн өйдөбүлүнэн ыытыллынна.
Тэрээһин үөрүүлээх аһыллыыттан саҕаланна. Аһыллыыга нэһилиэк баһылыга Белдолюбскай М.М. эҕэрдэтэ, оскуола директора Бурнашева А.А. оскуола историятын, үөрүүлээх күн былаанын билиһиннэрдэ. Ол кэннэ Н.Н. Тарскай бюһун иннигэр дьон-норуот тоҕуоруһа муһунна. Манна оскуола ветеран учуутала, музей төрүттээччитэ К.И. Румянцева Николай Тарскай олоҕун туһунан кылгас иһитиннэриини оҥордо уонна кини үтүө аатыгар сибэкки дьөрбөтүн уурдулар. Быйылгы үбүлүөйдээх сылга, оскуоланы бүтэрбиттэрэ 50 сылыгар - золотой выпусктар бэйэлэрин сэмэй бэлэхтэрин скаймейка оҥорон бэлэхтээбиттэрин бэлиэтээтилэр, махтаннылар.
Онтон бары "Спорт Албат аата" музейга экскурсияҕа киирдибит. Музей үс салаатынан арахсан, сир техникатынан, Н.Тарскай олорбут балаҕанын макетынан экскурсиялары тэрилтэ үлэһиттэрэ А.П. Пермякова, Л.С. Лугинова, история учуутала А.А. ГОтовцев уонна музей салайааччыта А.А. Бурнашева билиһиннэрдибит. Экскурсия кэннэ оскуолаҕа киирэн "Дьоҕуннааҕы кэпсэтии" кылаас чаастара тэрилиннилэр. Манна оскуола бочуоттаах выпускниктара, ветеран учууталлара ыыттылар, үөрэммит, үлэлээбит кэмнэрин, доҕотторун ахтан-санаан аастылар. Кылдаас чаастарын кэннэ кэлбит выпускниктары кытары "Махтал, эйиэхэ оскуолам" диэн оскуолабыт 100 сылын көрсө ыытыллыахтаах үлэлэр, попечительскэй сэбиэт, выпускниктары түмүү тула санаа атастаһыыта тэрилиннэ, кэккэ былааннар ылынылыннылар. Онтон бар күргүөмүнэн оскуолабыт остолобуойугар минньигэс эбиэккэ муһуннубут.
Күнүс 3 чаастан "Түмэн" НАК үөрүүлээх чааһыгар выпусктар эҕэрдэлэрэ, наҕараадалааһын тэрилиннэ. Ол кэннэ араас көлүөнэ выпускниктар ааспыт кэм ахтылҕанын тула киэһээлэрин бэрт сэргэхтик атаардылар.