Бу дьыл алтынньы 10 күнүгэр Баатаҕай нэһилиэгэр орто оскуола иһинэн үлэлиир Н.Н. Тарскай аатынан «Спорт Албан аата» түмэл төрүттэммитэ 30 сылын бэлиэтээтибит. Түмэли 1996 с. энтузиаст, педагогичскай үлэ ветерана Румянцева Ксенья Иннокентьевна төрүттээбитэ. Ол иннинэ оскуолаҕа кыраайы үөрэтэр муннук үлэлээбитэ, салайааччынан историк учуутал Ушницкай Петр Николаевич анаммыта.
«Түмэл-олох кэрэһитэ» тэрээһиҥҥэ ыраахтан-чугастан үгүс киһи кытынна. Түмэл историятын үтүө кэрчиктэрин үллэстэр, үйэтитэр уонна инники кэскили түстэһэр күн экскурсияттан саҕаланна. Ол курдук, саха балаҕаныгар аал уоту оттон, Николай Тарскай Чараҥай оскуолатыгар үлэлиир кэмигэр оҥотторбут спортивнай площадкатын макетын экспонат быһыытынан арыйдыбыт, ол кэннэ икки корпуһунан нэһилиэк историятын, дьонун-сэргэтин, үлэтин-хамнаһын билиһиннэрэр, сир техникатын павильонугар экскурсияларга сырыттыбыт.
Тэрээһин үөрүүлээх чааһа Баатаҕай оскуолатын өрөгөй ырыатынан саҕаланна. Спортсаала иһэ толору нэһилиэк спортивнай олоҕун кэпсиир быыстапканан киэргэммитэ дьон биһирэбилин ылла. Кэлбит ыалдьыттар истиҥ эҕэрдэлэрин, оскуола коллектива бэлэмнээбит эҕэрдэ кэнсиэрдэрин кэрэхсии көрдүбүт. Үөрүүлээх чаас кэннэ сандалы остуол тула олорон сэһэргэһэн, үҥкүүлээн, оһуохайдаан, санаа атастаһан тарҕастыбыт.
Үбүлүөйү тэрийбит Баатаҕай орто оскуолатын коллективыгар, директор, түмэл салайааччыта Алеанна Алексеевна Бурнашеваҕа бука бары ыалдьыттар ааттарыттан истиҥ махталбытын тиэрдэбит! Түмэлбит инникитин да үйэлээҕи түстүү, сайда-чэчирии турдун!
