Бүгүн – Ленинскэй хомсомуол төрөөбүт күнэ. Арассыыйатааҕы Ыччат Коммунистическай Сойууһа (РКСМ) 1918 с. алтынньы 29 күнүгэр рабочай уонна бааһынай ыччат Бүтүн Сойуустааҕы 1-кы съеһин кэмигэр тэриллибитэ. 1924 с. РКСМ-ҥа В. И Ленин аата иҥэриллибитэ — РЛКСМ буолбута. 1922 с. ССРС тэриллэр. 1926 с. хомсомуол “Ыччат Бүтүн Сойуустааҕы Ленинскэй Коммунистическай Сойууһа” – ЫБСЛКС (нууччалыыта ВЛКСМ) диэн ааттаммыта. Хомсомуол устаабыгар “Хомсомуол — Советскай Сойуус Коммунистическай баартыйатын эрэллээх көмөлөһөөччүтэ, кини резервэтэ.“ Хомсомуол быһаччы хомуньуус баартыйатынан дьаһаллар ыччат уоргана этэ.
Саха сиригэр 1920 с. муус устар ыйтан Саха сирин хомсомуола төрүттэммитэ. Саха хомсомуолун төрүттээһиҥҥэ активнай кыттыыны Максим Аммосов, Степан Васильев ылбыттара. Саха сиригэр хомсомуоллар ааттара гражданскай сэрии саҕана иһиллибитэ. Ол туоһутунан, Саһыл Сыһыыга, Хохочойго бандьыыттары кытта сэриилэспиттэрин саха литературатыттан ааҕан билэбит.
Бу бэлиэ күҥҥэ анаан олохтоох библиотека иһинэн үлэлиир «Эйгэ» түмсүү чилиэттэрэ дьиэтээҕи хаартыскаларыттан, оччотооҕу хомсомуол эдэр саастарын түгэннэриттэн оҥоһуу өй күүһүнэн тупсарыллыбыт хаартысканан быыстапкаларын сэҥээрэргитигэр ыҥырабыт.
