Бу дьыл балаҕан ыйын 4 күнүгэр Баатаҕай нэһилиэгэр, уруккунан Халдьаайы Сылаатыгар олорбут Михаил Иванович уонна Анастасия Петровна Романовтар сыдьааннара
өбүгэлэрэ олорон ааспыт үйэлээх өйдөбүнньүктэригэр — дьиэлэригэр дьиэ кэргэҥҥэ аналлаах дьоһуннаах түмэл арыйдылар.
Бу, хас биирдии саха киһитин дууһатын таарыйар, төрүт-уус долоҕойун чөлүгэр түһэрэр улахан суолталаах дьыала. Өбүгэлэрбит дьиэлэрэ-уоттара – кинилэр тыыннара, үлэһит буойун буолан олорбут олохторо, оҕолорун-урууларын иитэн киһи-хара оҥорбут сыралара хатаммыт ытык миэстэ. Ону сиэннэрэ, хос сиэннэрэ Романовтар, Винокуровтар, Слепцовтар, Готовцевтар түмэл оҥорон үйэтиппиттэрэ – кэлэр көлүөнэлэргэ умнуллубат үөрэх, киэн туттуу уонна бэриниилээх буолуу холобура буолуоҕа. Түмэлгэ аймах дьон хаартыскаларынан матырыйааллара, уус хос эһэлэрин Михаил Иванович оҥорбут маллара турдулар. Инникитин да кэҥээн, сэдэх экспонаттарынан элбии турдун диэн баҕалаахпыт.
2015 с. өбүгэлэрин өтөҕүн бастакынан сөргүтэн, дьиэ-уот туттан, сайылык оҥостон сайылаан, бултаан ааспыта сиэннэрэ, СӨ физическэй культура уонна спорт үтүөлээх үлэһитэ, РФ физическэй культураҕа уонна спортка туйгуна Александр Будимирович Слепцов буолар. Бүгүн да кини аатын үгүстүк ахтан-санаан аастыбыт. Кини инникилээх көрүүтэ — удьуор аймах дьоно түмсэр, сынньанар, өбүгэлэрин сиригэр үйэлээҕи түстүүр тирэх миэстэ буоларын бигэргэттэ. Будимирович ситэрбэтэх, ыра санаа оҥостубут дьыалатын аймахтара салҕыыллар, үйэтитэллэр.
