Бу дьыл атырдьах ыйын 14 күнүгэр Баатаҕай нэһилиэгэр «Төрүт Баатаҕайдар» стелалара дьиэ кэргэн скверигэр арылынна. Стелаҕа нэһилиэк таһынааҕы уонна соҕуруу алаастарын картата, ол алаастарынан тарҕанан олорбут дьон төрүччүлэрэ QR кодунан, ону тэҥэ стела кытыыларыгар ити эҥэр турар ытык, бэлиэ миэстэлэр тиһилиннилэр. Барыта 55 төрүччү, ол иһигэр 8 тыһ. тахса киһи киирдэ. Төрүччүлэри Д. Киркинскай программатыгар уган, биир халыыпка тиһэн киллэрдибит.
Бырайыагы салайда энтузиаст, педагогическай үлэ ветерана Тамара Николаевна Соловьева. Бу үлэни төрүт баатаҕайдартан төрүттээхтэр үбүлээтилэр.
Кэнчээри ыччат хантан төрүттээҕин, кимтэн силистээҕин билэрин туһугар, төрүччү — өбүгэ быстыбат ситимэ буоларын өйдүүллэригэр, олорон ааспыт дьоммут ааттарын үйэтитиигэ туһуламмыт үлэ үтүө холобур буоллун!
Бырайыак олоххо киириитигэр көмөлөспүт республикабыт араас муннугар тарҕанан олорор биир дойдулаахтарбытыгар дириҥ махталбытын тиэрдэбит!
Санатар эбит буоллахха, Баатаҕайдар үйэтитиигэ туһааннаах, өбүгэлэрэ олорбут миэстэлэрин сөргүтэр, тупсарар бырайыактарын олоххо киллэриинэн өссө 2020 с. саҕалаабыттара.
