Николай Тарскай үбүлүөйдээх сыла түмүктэннэ!
Саха сиригэр маассабай спорду, физическэй хамсааһыны көҕүлээччи, тэрийээччи Николай Тарскай 100 сыллаах үбүлүөйүн түмүктүүр үөрүүлээх тэрээһин бу дьыл ахсынньы 19 күнүгэр Дьокуускай куоракка П.А. Ойуунускай аатынан Саха академическай театр уораҕайыгар үрдүк таһымҥа ыытылынна. Тэрээһиҥҥэ ыраахтан - чугастан ыалдьыттар, биир дойдулаахтара, аймахтара, үөлээннээхтэрэ, спорт салалтатын үлэһиттэрэ кыттыыны ыллылар.
Театрга Николай Тарскай олоҕун суолун туһунан Баатаҕайдааҕы "Спорт албан аат" музейа, олохтоох библиотека, улуустааҕы кииннэммит библиотека тиһигэ, Сэһэн Ардьакыап аатынан улуустааҕы кыраайы үөрэтэр музей, СӨ Национальнай библиотеката кыттыһан бэлэмнээбит «Кэскиллээҕи өтө көрөн» быыстапкалара бар дьон болҕомотун тарта. Быыстапканы Баатаҕайдааҕы С.Ф. Сивцев аатынан "Түмэн" НАК иилээн-саҕалаан ыытта. Биир дойдулаахпыт туһунан литературнай монтаһы орто оскуола "Уолан" уолаттар бөлөхтөрө аахта, үгүс дьон биһирэбилин ылла.
"Спорт албан аат" музейын, Н.Н. Тарскай үбүлүөйдээх сылларын тэрээһиннэрин тустарынан иһитиннэриини оҥордо Баатаҕай орто оскуолатын директора, музей салайааччыта Бурнашева А.А., улууска ыытыллыбыт тэрээһиннэри, Н.Н. Тарскай туһунан сырдатыылары, кинигэлэри билиһиннэрдилэр улуус киин библиотекатын кыл.библиотекара Попова М.К., СӨ Национальнай библиотекатын үлэһитэ Готовцева Т.Н., Тарскай туһунан электроннай библиотекаҕа баар матырыйааллары сырдатта улуус киин библиотекатын электроннай ресурсалар отдел салайааччыта Колодезникова Р.К., Н. Тарскай тус порталын туһунан иһитиннэрдэ Баатаҕайдааҕы библиотека сэб. Пермякова А.П. уонна көҥүл тустууга сылыйн аайы ыытыллар чемпионаттар тустарынан улуус музейын үлэһитэ Сивцев А.П. Быыстапкаҕа СӨ народнай артыыһа, бэйэтин кэмигэр спордунан дьарыктаммыт А.М. Алексеев Тарскай илии баттааһыннаах грамоталарын аҕалан туруорбута элбэх киһи болҕомтотун тарта, үгүс кэрэхсэбили ылла.
Быыстапка кэннэ тэрээһин үөрүүлээх чааһа саҕаланна. Манна Тарскай үбүлүөйдээх сылын тэрийэр кэмитиэт бэрэссэдээтэлэ, СӨ Бырабыыталыстыбатын бэрэссэдээтэлин солбуйааччы Сергей Местников, СӨ физическэй культураҕа уонна спорка миниистирэ Леонид Спиридонов, СӨ Судаарыстыбаннай Мунньаҕын (Ил Түмэн) депутата Георгий Балакшин, Уус Алдан улууһун баһылыга Василий Аммосов, Баатаҕай нэһилиэгин баһылыга Михаил Белолюбскай, Николай Тарскай аймахтара, о.д.а. кытыннылар, өрөспүүбүлүкэҕэ физкультурнай хамсааһыны сайыннарыыга кылааттарын киллэрсэр, Николай Тарскай аатын үйэтитиигэ үлэлэһэр биир дойдулаахтарбытыгар уонна өрөспүүбүлүкэҕэ спорт, физическэй культура эйгэтин үлэһиттэригэр үрдүк наҕараадалары туттардылар.
