Н.Н. Тарскай аатынан "Туймаада" стадиоҥҥа ыалдьыттаатыбыт!
Ахсынньы 19 күнүгэр, Николай Тарскай үбүлүөйдээх сылын түмүктүүр тэрээһин чэрчитинэн, кини аатын сүгэр "Туймаада" стадиоҥҥа куоракка олорор уонна олохтоох Баатаҕайдар диэн көрүстүбүт, инники былааннары, үлэлэри ырытыстыбыт. Куоракка олорор биир дойдулаахтарбытыттан үгүс киһи муһунна. Нэһилиэктэн ох курдук оҥостон дьахталлар, эр дьон ансамбллара тэрээһини бэйэлэрин ырыаларынан киэргэттилэр.
Нэһилиэк баһылыга Белолюбскай М.М. куорат түмсүүтүн чилиэттэригэр, биир дойдулаахтарыгар өрүү көмөлөһөллөрүгэр, сүбэ-ама буолалларыгар махтанна уонна эҕэрдэтин эттэ. Инники былааннары, соруктары билиһиннэрдэ. Куорат Баатаҕайдарын түмсүүтүн салайааччыта Троев А.Я. үбүлүөйдээх сылга олоххо киирбит, киириэхтээх үлэлэри иһитиннэрдэ. Төрөөбүт нэһилиэктэрин кытары ыкса сибээһи күүһүрдэргэ мэктиэ тылын эттэ. Тустаах дьоҥҥо үөрүүлээх быһыыга-майгыга нэһилиэк салалтатын, общественноһын, орто оскуола коллективын аатыттан наҕараадалары туттардылар.
Тэрээһин бэлиэ түгэнинэн буолла - "Туймаада" стадиону кытары бииргэ үлэлэһии сөбүлэҥин түһэрсии. Икки өттүттэн былааннаах үлэни ыытарга, биир санаанан үлэлииргэ, Н. Тарскай аатын үйэтитиигэ бэлэмнэрин биллэрдилэр. Түмүккэ минньигэс астаах остуол тула санаа атастаһыыта тэрилиннэ.
