Бал чемпионов - 2025
Быйылгы сылга спорт эйгэтигэр уһулуччу ситиһиилээх, бастыҥ спортсменнары чиэстиир "Бал чемпионов" Николай Тарскай 100 сылыгар ананна. Онуоха нэһилиэк библиотеката, орто оскуола музейа, улуустааҕы кииннэммит библиотека тиһигэ уонна улуустааҕы Сэһэн Ардьакыап аатынан музей кыттыһан биир дойдулаахпыт Н.Н. Тарскай олоҕун, үлэтин, кини аатын үйэтитии тустарынан быыстапканы туруордубут. Бу арыта "Өрөгөй" киэҥ уораҕайыгар тэрилиннэ.
Быыстапканы үгүс киһи сэргээн, кэрэхсээн көрдө-иһиттэ. Орто оскуола музейыттан сэдэх экспонаттар, суруйуулар альбомнар, үйэтитиигэ ыытыллыбыт үлэлэр, киин библиотека электроннай библиотекатыгар киирбит матырыйааллар, улуус музейыттан Тарскай аатыгар ыытыллыбыт чемпионаттар кубоктара үгүс дьон болҕомтотун тарта. Маны таһыан "Туймаада" стадионтан Н.Тарскайы көрдөрөр манекен кэлэн турбута, элбэх киһи хаартыскаҕа түһэн астынна.
