Үҥкүү абылаҥар уйдарбыта 40 сылыгар
Бу дьыл муус устар 5 күнүгэр Баатаҕай нэһилиэгэр "Үҥкүү абылаҥар уйдаран" айар биэчэрин Н.Н. Тарскай аатынан Баатаҕай орто оскуолатын эбии үөрэхтээһинин педагога Мария Афанасьевна Горохова тэрийэн ыытта. Мария Афанасьевна бу эйгэҕэ үлэлээбитэ 40 сылыгар уонна үбүлүөйдээх 60 сааһыгар аналлоаах тэрээһин үгүс дьону түмтэ, үҥкүү кэрэ эйгэтигэр киллэрдэ.
Кини хореограф идэтин баһылыаҕыттан олоҕун үҥкүүгэ эрэ анаата. Аан маҥнай олоххо хардылаарын ыраах Дьааҥы улууһуттан саҕалаабыта. Онтон Мүрүтээҕи "Уолан" гимназияҕа, Лөгөй нэһилиэгэр Саха-Бельгискай гимназия үлэлээбитэ. Кэптэнигэ үлэлиир сылларыгар "Айыллаана" оҕо үҥкүү бөлөҕүн тэрийэн, оҕолору дьарыктаан, араас дойдуларга сылдьан, күрэхтэһэн үгүс ситиһиилэммиттэрэ. Кэлин төрөөбүт нэһилиэгэр Баатаҕайга кэлэн кулуупка, оскуолаҕа үлэлиир. Күн бүгүн 3 көлүөнэ үҥкүү бөлөхтөрү салайар, оскуола оҕолоругар "Алаас уолаттара", "Кэскилээнэ" бөлөхтөрдөөх.
Бэлиэ күн тэрээһинигэр улуус культураҕа управлениетын салайааччыта Нафанаилов С.С., нэһилиэк баһылыга Белолюбскай М.М., үөрэппит учуутала, бииргэ үлэлээбит, үлэлиир коллегалара Дьааҥыттан, Кэптэниттэн, улуус иһиттэн уо.д.а. кэлэн кыттыыны ыллылар. Бу күн Мария Афанасьевнаҕа "Саха Республикатын культуратын туйгуна", "Баатаҕай нэһилиэгин социальнай-экономическай сайдлыытыгар кылаатын иһин" анал бэлиэлэр үөрүүлээх быһыыга-майгыга туттарылыннар. Кулууп киэҥ уораҕайыгар үҥкүү эйгэтигэр араас сылларга үлэлээбит кэмнэрин, иитиллээччилэрин, бырайыактарын, ситиһиилэрин туһунан дьоҕус быыстапка турда, үгүс дьон болҕомтотун тарта.
