Сэрии кэмин оҕолоро ыалдьыттаатылар
Ыам ыйын 7 күнүгэр Улуу Кыайыы 80 сылыгар, орто оскуола үөрэнээччилэригэр эйэлээх олох уустара - сэрии кэмин оҕолорун кытары көрсүһүү тэрилиннэ. "Оҕо сааспытын уорбута сэрии" диэн ааттаах оччотооҕу ыар кэмҥэ, аас-туор олоҕу олорбут сэрии кэмин оҕолоро - Троева Вера Иннокентьевна уонна Белолюбскай Прокопий Прокопьевич ыалдьыттаатылар.
Көрсүһүү саҕаланыытыгар орто оскуола 3 кылааһын үөрэнээччилэрэ Кыайыы туһунан хоһооннорун ааҕан иһитиннэрдилэр. Ол кэннэ ыалдьыттар, Белолюбскай П.П. бэйэтин оҕо, эдэр сааһын туһунан, Троева В.И. үлэнэн иитиллэн улааппытын туһунан истиҥник кэпсээтилэр, оҕолор болҕомтолорун тартылар. Үөрэнээччилэр интэриэһиргээбит боппуруостарыгар хоруйдаатылар. Кинилэр кэннилэриттэн орто оскуола 1 кылааһын үөрнэээччитэ Арчылаан Ядрихинскай сэрии сылларыгар Чараҥай оскуолатын үөрэнээччилэрин туһунан айар үлэтин билиһиннэрдэ. Маныаха, кини учуутала Самсонова М.Н. бу үлэни туохха, хаһан суруйбуттарын кылгастык билиһиннэрдэ.
Түмүккэ, оскуола директорын сүбэһитэ Сидорова Н.Н. кыттыыны ылбыт ыалдьыттарга Өрөгөйдөөх бырааһынньыгынан эҕэрдэ суруктары туттартаата.
